【社區人．訪】30萬本漫畫塞爆6間房　這位中佬：獨愛龍虎門　

現今一機在手，幾乎可以睇盡天下漫畫，不過幾十年前，書報攤就是漫畫唯一的來源，自小就開始在書報攤打躉的羅榮（Wing Law），不但睇盡大大小小的港產漫畫，更多到要拎去燒。

因利乘便，好多時候就是孕育興趣的搖籃，Wing Law亦不例外，因父親在酒樓工作，所以Wing Law自小便在酒樓流連，自然與酒樓門口的報紙檔熟絡，日日都可以享受免費漫畫「放題」，絕對「贏在起跑線」，「70年代初，香港漫畫大多數在報紙內連載，例如《生報》、《喜報》、《青報》及《金報》等，所以經常追睇《生報》的連載漫畫，必睇嘅肯定係《小流氓》，《細路仔》嘛，當然喜歡打打殺殺的題材。」

報攤打書釘

自此，Wing Law便與港漫結下不解緣，「到70年代後期，愈來愈多港產漫畫獨立出版成書，除了《小流氓》，仲有《如來神掌》、《李小龍》、《醉拳》等。」當時Wing Law已投身社會工作，任職點心學徒，所以睇漫畫方式亦有所改變，不再於書報攤「打書釘」，「每星期都會買漫畫，不論任何題材都會買，每個月都會花一半人工在漫畫上，每星期大概買廿幾本。」

別人燒街衣他燒漫畫

買得多，家中所堆積的漫畫陣容，亦愈見龐大，Wing Law當時已經要面對土地問題，「除咗將睇完嘅漫畫，送俾隔離鄰舍，每年仲會搞一次『清倉』，就係跟住阿媽去燒街衣，人哋燒街衣，我就燒漫畫，成桶漫畫書，燒完之後灰燼都仲有成尺厚。」

80年代起，港產漫畫開始步入百花盛放時代，不再只有打打殺殺，靈異、搞笑、愛情等題材都大受讀者歡迎，但令Wing Law情有獨鍾的，依然是《龍虎門》，「當年劇情會一浪接一浪，打完香港18區，再去日本打羅剎教、韓國白蓮教，同埋泰國通天教，令你好想一路追睇，最經典一幕，當然是火雲邪神之死，被王小虎以『霹靂狂龍』踢死，睇到血脈沸騰。」

龍虎門新不如舊

直至2000年，因《龍虎門》版權問題，改名為《新著龍虎門》，但Wing Law認為新不如舊，「舊著（即約2000年前的龍虎門）無論角色及武功設定，劇情都較合理，但新著內，角色打極都唔死，幾百期都係咁。」問Wing Law為何現在仍要繼續看，原因好簡單：「情意結。」