【社區小小事】狗界逆流大叔　揸寵物白車24小時on call

人類遇上身體不適，可坐救護車到醫院求醫，家中寵物如果突然生病，又可以如何？在香港，帶同寵物搭車本來已困難重重，如在半夜遇上緊急情況，更難上加難。但有一位有心人，自4年前開始了全港唯一的「寵物白車服務」，他就是「一寵愛物流」的豪哥。他不收車錢不收清潔費，「白車」車廂內有氧氣機等急救設備，為寵物全天候隨時出動：「就算半夜都好，有咩事嘅，call我！」

「今年3月有日朝早，我隻狗QQ突然喺屋企抽筋，抽咗5次，我就帶佢出元朗睇醫生，去到診所時，醫生話佢哋診所幫唔到QQ，要我轉院，但臨急臨忙去邊度搵車車我呢？好彩打畀豪哥，佢就即刻飛出嚟接我！」寵物「白車」用家之一、北京狗QQ主人阿溰表示，3年多前已在網上知道豪哥會提供寵物接送服務，「嗰次豪哥由元朗接我哋去太平道，點知嗰間醫院停電，好不幸我哋又再跨區去灣仔......但豪哥完全冇收錢，仲叫我快啲去睇完醫生先講啦！」最後，16歲半的QQ還是捱不住，最終在診所離世，而豪哥亦接載QQ到善終公司，陪伴牠走最後一程。

由做生意變做義工

「本來係做普通寵物接送，幾年前香港好少車可以畀寵物坐。做做下再發現，原來香港人好需要接送寵物去睇醫生嘅服務。」眼前的豪哥是個膚色黝黑的硬漢子，雖然採訪期間會跟家中狗狗說「最憎係你哋」，卻又忍不住面露笑容，再三望向牠們。

現時養了6隻狗的豪哥說，4年前開始放下室內設計及工程的工作，一邊做寵物寄養生意，一邊做寵物接送服務，希望感染周邊的人，以至整個社會，願意接納寵物乘坐交通工具出入。一次偶然機會下，他接載一隻中暑唐狗前往求醫，之後一傳十、十傳百，很多寵物主人會在需要時急call豪哥，「以前架車未有啲咩設備，隻唐狗當時行唔到，咪用張床單或窗簾布包住佢，同主人一頭一尾抬上車。之後開始斷斷續都有主人搵我車寵物去睇醫生。」

由數年前一個月最多一宗緊急接送，到現時每月至少5宗，服務遍及狗、貓、兔、蛇，甚至是羊，豪哥一律都不收錢，「反正都係想幫人。」豪哥指，現時香港「寵物白車」服務只有他自己一個人、一輛車，雖然很希望可以召集更多有心人建立「白車」網絡，但他也體諒香港人工作忙，要生活、要交租、要食飯，「有時都有啲狗友同我講邊啲時間得閒，可以搵佢幫手，不過就冇辦法全職做......見到大家都有個連理心：如果嗰一刻身邊有人肯幫手，即刻車寵物去醫生度，可能就係差短短時間，隻寵物係可以救得返。」

「喺我依家生活條件仲許可，做呢件事(寵物白車)無傷大雅，又唔係日日都有急救，而且我嘅成本唔多，出車入油最多咪幾百蚊一次，睇少場戲都喺返度啦。」

「白車」專業嗎？

所謂的「寵物白車」，名副其實是輛白色7人車，外形與一般私家車無異，內裏則裝備了不少由豪哥添置的急救裝備：有由外國訂回來、紅色的寵物用救生帆布，可讓主人在狹窄地方揹起寵物；亦有藍色擔架床，遇上體型較長、較重的狗隻，或者村屋等需要上落的環境也可大派用場。此外，車廂內還有一部耗上過萬元購買及改裝的製氧機，「同人一樣，喺診所返屋企或者由診所轉診所，中間路程都係需要氧氣。」

採訪前數天，豪哥亦有出動。晚上11時左右，錦上路有一隻10歲德國狼狗突然行不到直線，連站立也是不穩，眼珠更不斷上下轉動，主人大為擔心，即召豪哥幫忙，「主人新領養隻狗，明知佢咁老都肯收養。當晚我去到，隻狗好驚係咁掙扎，擺唔到上擔架，唯有試下傍住佢行上車。」他們先後到過幾間診所，醫生認為狼狗患上前庭神經老化，但他們都拒絕收症，直至去到西營盤一間24小時診所，醫生診斷後決定開藥，狼狗不用留院，「睇完醫生都兩點幾，都要帶佢返屋企，咁大隻狗會有咩車搭？所以我都等埋檢查完再車返佢哋走。」豪哥從家中出發，由新田到錦上路，再去西營盤然後折返錦上路，回到家中已是凌晨4時多。

豪哥指，「救護車」一晚只可完成一個柯打，遇上「撞單」，亦只感無奈，「香港現時嘅資源，係唔會有個團隊，有醫生、有護士又有車，好似人用嘅醫療體系咁，隨時on call唔收錢。幫唔到嘅case最後係點？我都唔敢追問啦。」豪哥又指，不介意主人「濫用」白車服務，皆因他明白，每個主人面對患病寵物都是心急如焚，「有時電話入面講到好緊急，去到可能隻狗係類似腸胃炎，但仲好活躍。咁係咪叫濫用呢？其實冇一條界線。解釋畀主人聽，佢哋會經一事長一智，下次唔會（亂call）囉。」「寵物白車」服務雖然不需收費，不過豪哥希望，大家使用後可將大約車費捐給各大狗場，延續他的一腔熱誠，繼續幫助其他有需要動物。