【四電一腦】實施後回收商無啖好食　工人靠兼職維生

朱先生從事回收業三十多年，位於深水埗醫局街的店鋪由父親交棒給他，在「四電一腦」實施後，他指生意大減，回收貨量比以往少了四分之一。以往經回收的貨物，會轉運到南非當二手電器出售，「香港話要環保，我哋呢一行就最環保，講真嘅，連一粒螺絲我哋都運出口」。

對於政府指歐綠保可回收整個香港的電器，他指「你成個深水埗嘅貨交畀我，我都做唔晒，你睇吓歐綠保，你上YouTube check吓，歐綠保嘅冷氣機全部都堆喺度，佢拆到咩？佢拆唔到㗎，咪咁傻，呢啲直頭係官商勾結！」

亦有前線回收工人指現時生意淡靜，只能依靠廢紙回收維持生計，等足一整天，也只有零星市民來賣廢紙；又指單靠回收，並不能維持生計，必須兼職幫補。七十三歲的回收工人周先生指，單靠回收，月入只有約六千元，每日下班後，便需要「變身」成食環署外判清潔工，於區內收垃圾，賺取九千五百元，才能勉強維持生計。

周先生指回收業已式微，有部分回收工場更需要在周末休息，以節省開支。「回收電器冇咩前途，都係畀大公司食晒」，「家電嗰啲，我哋又冇倉，收家電冇意思，架車咁細，放兩個雪櫃就仆街，唔駛做。」「嗰間大公司回收，你係物主要畀錢回收，不如唔畀你，畀我哋回收都有十幾廿蚊，變相我哋仆街賺少十蚊廿蚊。」

面對業界困境，香港環保廢料再造業總會會長劉耀成建議，由業界、歐綠保及政府三方合作，希望政府擔任橋樑角色，回收商就擔任運輸角色，回收商向清潔工人在不同屋邨回收電器，再由回收商送往承辦商歐綠保進行拆解，過程中回收商能賺取運輸費，他認為是三贏。

「市民方面能夠即時做到除舊服務，清潔工人能賺取下欄，可能十元三十蚊，我哋回收商亦能相對地集中埋一齊運送畀佢，大概可以賺取一啲運輸費，運輸費粗略估計六至七十蚊一部，如洗衣機、雪櫃等大型電器。」不過他指直至目前，承辦商仍然未有跟回收業界聯絡。

劉耀成又指以往回收商回收的電器，會將仍然能夠運作的電器賣到二手市場，不過「四電一腦」實施後，電器會送到歐綠保直接進行拆解，變相令二手市場會萎縮，基層市民既唔能夠買到平價電器，亦浪費仍然能夠運作的電器，變相不環保。