【菲獄風雲】坐監都要交水電費 每月給倉友保護費
電影版的監獄風雲，教人心驚膽跳。真實版的菲國監獄，令你覺得現實更荒謬。《香港01》記者聯絡到在菲獄中的鄧龍威，他稱：「我俾錢佢哋（倉友）多謝照顧我，唔好搞我，你諗下咩心態，呢啲心理壓力點頂。」做酒吧工作的他，2000年去菲律賓旅行，一去16年，捲入毒品案，判監40年。他現已44歲，坐監的生活費要自掏荷包，監獄也有很多送禮交際費用。
「菲律賓人逢年過節要獻禮，差佬問你攞錢，同倉犯人問你攞錢，監獄入面好多黑社會，佢打正招牌問你攞錢。菲律賓最大的節日是聖誕節、新年。另外，幫會每年周年問你攞錢，菲律賓人好鍾意打籃球，經常搞籃球比賽，咁要做球衣，又問你SPONSOR（贊助）攞錢，冇得冇架，你可以話冇錢俾咩呀？借都要借俾佢，冇得冇架。」他2014年在網台奇案節目《東頭灣道99號》的一段錄音。
「監獄內要買間房，你要搵個地方瞓覺，又係要俾錢，冇錢，瞓街啦。」現時他住的一個60至70平方呎的板間房，也是靠捐款5000元買來。2011年他跟張泰安被判到New Bilibid Prison。
當年政府派6000元給香港永久居民，身在菲國的他們也需要這筆錢買房，若不買房間，就要跟當地人睡大倉，環境惡劣之餘，也會遭戲弄。「謝偉俊幫我們問政府，但政府回覆稱我們沒有智能身分證，所以不合資格。」後來《南華早報》報道後，有讀者捐款，加上謝的支持，兩人才能各自買下房間。
房間以外仍有其他雜費，「水電自己付，你會諗坐監都要交電費？係架，呢間房有幾大？有個電標，每月問你收電費，外面收11比索1度電，呢度25比索，仲要賺你。水要俾錢，以前5比索一桶，現在10比索。（10比索約1.7港元）」他稱每日只有一小時免費供水，但一個倉百多人，根本很難取水，只有付費才有機會用水。
監獄內可以買餸煮飯
食物方面，監獄的免費膳食份量少，他稱不夠當地人搶。不過，有錢也可以「食好啲」，「裡面有街市，可以自己煮，魚蝦蟹石斑，有錢就得。」
「以前法庭開審，有囚車車我們去，獄警問我們攞油錢，冇錢入油喎，如果唔係點車你去，仲要請佢哋食飯。」如果不聽話，就要被指派工作，洗廁所、看門口、或者其他不好對待。
他意難平，也曾經尋死，「試過一晚瞓唔到，我行出去個倉，夜晚好多人睡了。有個大堂，我見到地下有條繩。」他將繩綁到高處上吊，眼前一黑，突然繩斷了，「仲整到尾龍骨痛，唔係呀，死都唔俾我死，要我受苦，於是又返去瞓覺。」獄中有些人用毒品麻醉自己，逃離殘酷的環境。
如果我多些同家人傾偈，搬出去住都見下面，回去跟他們食飯傾偈，他（父親）不會諗唔知點解生咗個仔出嚟冇教好佢。
反省對不起家人
鄧龍威的父親是警長，他在菲扣留期間，父親吞槍自殺。鄧兩年前接受網台節目《東頭灣道99號》訪問時坦言，「我令父親好失望，點解個仔係咁，他初時唔知菲律賓的差人會屈人誣告，他自己也是一個差人，（佢覺得）宜家咩年代，2000年仲有人砌生豬肉？你冇做過點會屈你。如非發生人質事件，都唔知菲律賓差佬好hea。」
節目主持花家姐稱，2014年收到鄧的來信，並在節目中講述他的案件，有聽眾聽後也捐助支持鄧龍威在菲囚生活，「我睇咗單案背景資料、案情，之後覺得各樣嘢沒有法律精神，加上菲律賓發生冤案唔出奇，我信佢係無辜，所以去幫佢。」