今年警方抄牌特別狠　司機：泊到去墳場都中一張 叫我泊去邊？

「呢幾年的確抄得好勁，以前我哋入茶記食半個鐘頭飯，泊响横街都未必會抄，依家抄梗！差人依家有咩做，咪只係抄牌囉！」有的士司機覺得，警察抄牌一年比一年狠。綜合警方提供、因違例泊車發出「定額罰款通知書」的數字顯示，2017年警方平均每日發出5,041張牛肉乾，而2018年首三個月計算，警方平均每日則發出5,451張牛肉乾，比去年多出約410 張，升幅接近10％，相當誇張。

警方近年狂發牛肉乾，令到不少職業司機苦不堪言。「一張牛肉乾三百二，已經係半日人工，梗係搏唔過。以前食半個鐘頭晏，會偷雞泊响橫街，依家揾食惟有先將車泊入停車場，泊車費連埋飯錢，一餐飯成本要八九十蚊，真係好貴。」揸了多年的士的石仔說。

石仔主要在港島區開工，他指不少地區一泊車就抄牌，但以往被認為是抄牌黑點的中環，近年卻少抄。「中環例如近太子大廈，泊街嗰啲都係有錢佬車，有司機响度等，泊幾耐都唔會抄；相反你去太古城，泊一陣都即刻中。」石仔說，近年因執法嚴了，他也不敢四圍泊。

作為的士司機對抄牌雖提心吊膽，惟他指有些地區的胡亂泊車情況的確嚴重：「好似灣仔道街市對出那三條行車線，經常有車泊响度阻塞交通，加上有店舖胡亂放雜物出馬路，呢啲就真係要執法！」

除了職業司機，有平日揸綿羊代步的市民也表示，差人連泊在後巷的電單車也不放過，半年內已走過三四次鬼。「唔係我唔想泊電單車位，係根本唔夠電單車位泊。」市民黃先生表示，近年私家車位貴，他本來揸私家車的，也轉揸電單車代步。但他一直找不到月租電單車位，近一年惟有四圍泊。對於每個月也被抄牌一次以上，他也感無奈。「泊到去墳場都中一張，你話我可以點？」