港版羅拉做運輸因討厭是非　放假會扮靚着裙：提醒自己係個女仔

去年有網民拍下一名女搬運工人爆肌拉貨相片，惹來迴響。這名「港版羅拉」朱芊佩（小珠）接受《香港01》訪問，再次引來熱議。不少網民留言均大讚小珠，「又叻又靚又捱得苦」。
生存之上，生活之下，小珠背後還有甚麼故事，讓她選擇從事辛苦的搬運工作？

中五畢業後，小珠已投身職場，「會考完就即刻做嘢，爸爸生意失敗，所以我覺得要撐起頭家，唔可以靠人哋。」身為家中長女的小珠，年紀輕輕就成為了家庭的經濟支柱，「幫補到就會幫，就好似近日業主加租咁。」

成為搬運工人前，小珠多次轉行，做過酒店保安、清潔、文職、救生員等，至八年前才決意投身運輸業，「畀人無中生有，明明無嗰種居心，或者無嗰樣講到有嗰樣，老細又要信嗰啲人，覺得好委屈。」小珠向來喜歡無拘無束，「做運輸自由自在，無咁多是是非非、勾心鬥角，開心、自由、輕鬆啲。」

她自問「男仔頭」，每天與眾多男搬運工人合力搬貨，休憩時也會「傾馬經、講波」，很快便融入這班男人天地，「我鍾意有咩講咩，有嗰句講嗰句，唔使猜測，唔使諗咁多。」

正所謂巾幗不讓鬚眉，小珠平日上「戰場」時，總是威風凛凛，穿上淨色小背心和熱褲，大汗淋漓地搬貨上貨。但原來私下的小珠仍有一顆少女心，溫柔、體貼，「會煮嘢食、做家務」，「行街扮靚，放假嗰陣會着裙，要時刻提醒自己係個女仔。」