【吊臂撞橋】開工九小時　司機認失魂願賠償：抱歉累咗好多人

昨日（20日）下午約5時許，一條橫跨柴灣道的行人天橋遭一輛重型吊臂車的吊臂撞毀。涉事吊臂車疑未收好吊臂，吊臂卡在橋身，令車身傾斜，車頭離地。司機63歲姓葉，事發後一度被困由消防救出，送院治理。

姓葉司機今午出院，表示昨晨8時開工，負責吊物件往筲箕灣附近球場，由於要留空間擺放木枕，因此吊臂「升高咗少少」，略高於車頭。行駛至涉事位置時，車輛正落斜，葉沒有留意撞橋，亦未能留意有車響號，出事一剎衝力巨大，惟葉仍未察覺所為何事，以為自己撞壆。

涉事司機駕駛吊臂車逾30年

而葉面部撞上軚盤，鼻子受傷流血，須縫數針。他駕駛吊臂車30幾年，造成事件感抱歉：「失魂起上嚟冇辦法。我都好抱歉，累咗好多人。一定係擔心，（賠償）到時至算。」事故中行人天橋被撞毀，有指維修費達百多萬元，葉表示願承擔責任：「責任上喺晒我度，當然我畀......我自己大意。」，惟他亦坦言﹕「要我賠，我都冇錢，慢慢嚟啦。」葉又透露自己是打工仔，稍後會聯絡公司：「老細應該好擔心。」

路政署昨亦回應指，公共道路及其附屬設施若因交通意外事故被損毀，政府會按實際情況及既定機制，向涉事人士追討維修費用。

重型工程車載天橋　穿大街小巷

中午時份，有網民在西區發現四輛重型工程車，包括一輛吊臂車，載同清拆下來的天橋，途經卑路乍街，懷疑運往南區。柴灣居民程太表示，意外未有造成嚴重傷亡已屬幸運，認為司機是次失責，應收好吊臂才開車。她又指，涉事天橋是不少學生的必經之路，柴灣道行車繁忙，故天橋必須重建。