【藍天白雲．影評】導演張經緯坦白地告訴你：明天不會更好

【睇完影評，有嘢想講？用香港01 app 入嚟撐場beta，有記者、博客同你一齊玩金像獎2018大討論。】

《藍天白雲》改編發生於2000年的命案，18年前的事了。不計劇本創作，只計算拍攝，也是三年前的事。拖了好一段時間才面世，會否太遲？好像有點，畢竟，格局和調子跟《踏血尋梅》實在很相似，而《踏血尋梅》是一齣2015年上畫的電影，記憶猶新。

換個角度看，又好像找到一個更加適合的時機。我會形容《藍天白雲》跟《一念無明》一樣，是一齣非常「應節」的港產片。盡量不劇透。少女睇個老竇同老母唔順眼，於是有計劃地謀殺，仲拖埋一直被欺凌的同學或男朋友落水。事後果敢自首。鄧麗欣就一如《踏血尋梅》的郭富城，負責查案，慢慢揭開少女為乜要弑父弒母，慢慢，更感同身受，明白到在某程度上，如果不用負上法律責任，自己都可能踏上同一條血路。

個阿爸阿媽係咪好衰，例如將個女掟上天花板或者起勢搖？唔係，個阿爸只係非常好色，但光明正大地玩援交而沒有打個女主意，甚至會為個女的名譽而動真火，就算可能用錯方法表達，也不能一口咬定當中沒有親情成份。阿媽更無辜，只係錯在唔出聲，百忍成金，隻眼開隻眼閉，大事化小小事化無，其實跟九成香港人沒有分別。咁都要死？個女係咪特別冷血，特別缺乏忍耐力？可能係，可能唔係。

【編按：以下內容或含少量劇透，逃生門在此。】

可能只係特別誠實。活在一個充滿壓力的社會，根本個個都想殺人。像鄧麗欣個角色，看似幸福美滿，只不過個本來係名醫的阿爸，有病了，要人照顧，已經搞到個女不斷發癲。可能因為自己大肚，自私，將所有耐性與愛心也放在下一代；也有可能因為個社會太無情，你就算花費大量金錢把父親送入老人院接受照顧，然後會發現所謂的照顧只是插條喉入身體強逼性灌奶入去續命，根本和慢性謀殺沒有分別，只會更殘忍。《一念無明》在為精神病人發完聲後，始終做做好心發放正能量，安慰大家只要懷著樂觀的心，明天會更好。

拍慣紀錄片的張經緯導演比較理性，坦坦白白告訴你，明天不會更好，只會更壞。然後，你看見年輕的父母當子女如玩具；然後，你看見萬寧的員工把七十歲的阿婆同事視為大賊，不留情面地把誤取印花看成《盜海豪情》般的驚天陰謀，告到天腳底也不肯罷休。哈哈哈哈，你會開始質疑，《藍天白雲》的學生哥學生妹，面對如此的社會，面對如此的未來，有沒有做錯什麼？好似真係無做錯喎。

（文章純屬作者意見，不代表香港01立場。）