【冬季流感】染病死亡女童就讀幼稚園　有家長安排子女睇雙重醫生

一名3歲女童於本月初因乙型流感併發腦病變，留醫聯合醫院深切治療部，延至今早（15日）去世。涉事女童就讀的幼稚園如常運作，並加強校內清潔，而大部份家長得悉事件後則感到錯愕及難過。
有家長指，正值流感高峰期，會留意子女身體情況，「以前小朋友感冒嗰啲，多數都會等到發燒先帶佢睇醫生」，但現時則會及早求診，甚至雙重求醫買個安心，亦有家長帶子女注射流感針，加強扺抗力。

記者今前往女童就讀的永樂創新英文幼稚園了解，其中詹太的女兒就讀K3，她指未擔心流感會於校內散播，「唔返學就無咩可能，唯有自己小心啲，出完街會幫阿囡消毒洗手。」現時則會時刻留意小朋友狀況，如女兒求醫用藥後，病情未見好轉，會帶她再向另一醫生求診。

她又指，校方日常的清潔措拖充足，老師會於學生返學前在校門探熱，如懷疑有發燒個案，會通知家長並要求帶子女求診；學生進入學校範圍內，亦需更換校內專用鞋子，始能在校內走動。小朋友咳嗽時，老師亦會即時帶往廁所洗手，「所以病菌應該唔會走到入學校。」

家長陳太則選擇為K3女兒注射流感疫苗，以加強防範，「私家打1次$90，啱啱先發現政府有資助，可以免費打。」她續稱，為兒女接種疫苗的做法於家長間並不流行，「可能覺得無事無幹，所以唔打啩。」

家長冀校方設​心理輔導

家長陸先生指，暫未擔心流感會於學校爆發，「社區都好多流感，始終好難完全杜絕」，他指近日已提醒就讀K3的女兒加強衛生意識，包括於進食前後及接觸眼睛前洗手，但他暫未考慮帶女兒打流感針，「希望小朋友靠自己免疫力抵抗，多過用疫苗防護。」

陸先生對學校發生不幸事件感難過，但認為校方亦需為校內學生安排心理輔導。