【01獨家．有片】呂麗瑤前教練：驚講錯嘢　到時麻煩　要請律師先

「香港欄后」呂麗瑤凌晨在Facebook貼出文章，指自己於初中時曾被教練性侵犯，事件引起廣泛關注；呂麗瑤的現任教練鄧漢昇今早接受電台訪問之後，《香港01》找到呂麗瑤其中一位前教練，欲了解他對事件看法，及曾否聽到呂麗瑤談及事件。這位前教練起初指「唔想講嘢」，及後指「驚講錯多到時麻煩，要請律師先。」

《香港01》翻查資料，發現當年呂麗瑤就讀培正中學時，田徑隊共有三位教練，記者聯絡到其中一位教練，希望了解當時有否留意到呂麗瑤有異樣，以及曾否聽聞或知悉事件。

前教練承認曾為田徑教練，被問及有否聽聞呂麗瑤事件時，他表示「唔想講嘢，驚講錯嘢，到時有麻煩，要請律師先。」

記者：想問（你）之前係咪做過田徑教練？
前教練：係。
記者：有無聽聞「呂麗瑤性侵事件」？
前教練：我唔想講嘢，因為點解呢，我驚講嘢呢，講錯或者唔知點樣，到時就好麻煩，因為我要請律師先。
記者：但你有無聽聞過呢件事？
前教練：聽聞過。

記者：你曾經係佢教練，知唔知真係有人曾經性侵過佢？
前教練：咁我又真係唔知喎。
記者：佢有無向你吐過苦水？
前教練：呢個我都唔清楚，我唔知。

記者：我見到（屈臣氏）田徑（總會）網頁，阿sir都除咗名，會唔會知係咩原因？
前教練：可能都係呢啲事。
記者：點為之呢啲事？
前教練：即係你話睇見呢段新聞，不過真係唔好意思，我宜家好亂。
記者：佢有無向你尋求幫助？
前教練：我真係唔知，唔好意思，唔該你。