【走出隱蔽】懷孕離婚抑鬱　產後被迫送走1歲女　社工苦纏救全家

眼前的Lisa，笑容甜美燦爛，邊笑邊說自己是「好開心嘅一個人」。如今的她，已是浴火重生的鳳凰，膝下一兒一女是她堅強後盾；昔日的她，曾與抑鬱共生－－女兒自出娘胎起沒有笑過，也未見過媽媽露歡顏。是長子的支撐、社工與過來人不斷以電話、拍門攻勢苦纏，令Lisa一家三口走出悲情，不再隱蔽。苦媽媽終於笑了，現更以同路人身份，支援同病相憐的家庭。

產前：離婚鬱症　長子成唯一支柱

Lisa與前夫分開時剛再懷孕，帶著當時仍是中學生的長子，搬出了本來的家。一個沒有工作的弱婦女，面對身心及經濟壓力，走到慈善機構求助，幸好社工發現她有情緒問題，陪她求醫，及早發現患上產前抑鬱症。

「仔仔好少講嘢，但會用行動支持我，坐在我旁邊陪伴我。」剖腹產下女兒，Lisa形容產後連抱起她的力氣也沒有。「我記得我生完囡囡後，隔離床位的媽媽一家人圍住，一家人好開心，但我真係無人，得仔仔及醫院姑娘在旁邊。出院時仔仔一手抱著妹妹，一手拖著我的行李箱，我就翹住仔仔的手回家。我諗唔係有仔仔頂住，我一定冧。」

產後：沒動力照顧女嬰　似沒靈魂

「單親媽媽是辛苦，有情緒困擾就特別辛苦一些。」Lisa產後的抑鬱症仍然持續，約兩年前可謂低谷，大仔中學畢業後繼續進修，每月5,000多元學費，對他們來說並非小數目。大仔打工幫補，Lisa卻因未有向社署申報家人入息，要被扣綜援金，她又擔心要負刑責，愁緒再增：「我唔知道要報，當時擔心要坐監，心想：係唔係要告我，我坐監不要緊，但阿囡點算呢？阿仔點算呢？」

「混混沌沌，要女兒喊餓，才懂得起身準備食物，自己完全沒有意識要提早準備。」思想陷入了死胡同，疾病亦影響了Lisa對幼女的照顧：「當時囡囡都畀我鬧得好犀利，鬧完打完我又攬住佢喊。總之是控制不了自己。」

社康護士建議將當時一歲多的女兒帶到寄養家庭。「囡囡出世到那時，沒有離開過我一分鐘，佢都好慘。每晚瞓覺前都喊得好慘，喊足一星期。」最終不足一個月時間，Lisa便堅持接回女兒：「我說『如果我不能接回女兒，我的病情會加重。』跟囡囡分開時我都喊得好慘，每當聽到有小朋友的聲音，我就會衝出屋外，以為是自己的女兒。當時好似沒有了靈魂，沒有女兒，不知道自己為了甚麼生存。」

好轉：社工、過來人死纏爛打追訪

後來Lisa的個案交由新生會（新生精神康復會）跟進，機構派員上門家訪：不止輔導媽媽，也想輔導同一屋簷下的幼女。李麗華（Alley）是跟進Lisa個案的社工：「當時接觸Lisa其實很被動，聯絡她又好耐都唔聽電話，拍門都係拍好耐先開門，跟住入到去，我地見到的景象就是妹妹好似一舊年糕咁，撻在媽媽身上，我們用糖及玩具引她也沒有用，只願黏著媽媽。」

第一次見佢就係流住兩行眼淚同我打招呼，個女又眼紅紅，兩母女就喊咗好耐。

頭幾個月我係無見過佢笑的，同個女兩個都係唔識笑嘅。

一大一細，都是沒精打采，不開心的。媽媽不開心連帶影響女兒也不開心。

電話攻勢　打動「苦媽」

情況愈差，Alley卻愈不退卻：「電話搵唔到佢就上門拍門，拍到佢開門為止。」探訪的次數也更密集起來，而朋輩支援工作員亦會一同上門，以「過來人」的身份輔導Lisa。工作員充滿耐心，即使Lisa不一定聽電話，但仍每一星期打兩、三次電話給她。

「呢個朋友有同我有一樣的經歷，對著她，我可以有『被理解的感覺』。佢用佢嘅經歷話比我聽，其實行得過嘅，無問題嘅。」看到「過來人」的狀態甚佳，Lisa心想：「既然佢嘅狀態可以咁好，點解我唔得呢？只係睇我肯唔肯行出去啫？」有主動走出來的念頭，似乎就是好轉的先兆。果然，病況是漸入佳境了。

同行：女兒三歲　媽媽加入朋輩支援

Lisa幼女目前僅3歲多，開始上幼稚園，而Lisa痊癒後也當上了新生會的朋輩支援工作員，以過來人的身分為有相類經歷的人士提供支援。目前剛剛工作滿一年。「呢一年佢幫了我哋好多家庭，亦帶畀我哋好多快樂。」現在身為同事的Alley如是說。