【追龍．影評來稿】雙雄戲味營造失敗　吳毅將奸角最搶鏡

【睇完影評，有嘢想講？用香港01 app 入嚟撐場beta，有記者、博客同你一齊玩金像獎2018大討論。】

文：陳藍

《追龍》縱有甄子丹加劉德華，但一見導演欄有王晶個名，大家都預期到電影質素係咁上下，你唔係真係以為會拍套《無間道》、《喋血雙雄》的大作吧？筆者入場前就將電影歸類王晶前作《金錢帝國》或《黑白森林》之流，知道套戲差極都不會如《賭場風雲》般胡鬧。

看完之後亦都是八個大字：平平無期，符合期望。

丹爺加劉華，跛豪加雷洛，擺明是一套雙雄片，未入場前已估到劇情——二人相識相知再去到互相制衡，兄弟情深再去到二人決裂。雙雄片要好睇，兩個男主角的演技，能否帶出戲味非常緊要。

查實對華哥來說，此類電影拍慣拍熟，就如《暗戰》、《無間道》等，今次更是做返雷洛，可謂駕輕就熟。不過對丹爺來說角色絕對新鮮，先是放棄忠角形象轉做歹角，戲中文戲亦比武戲多。但縱使他如何努力練講潮州話，但潮州怒漢的感覺始終欠奉，就如網友所講，他似麥嘜校長黎根多過似跛豪。

另外，導演跟劇本亦未能令他好好把握人物的心路轉變，戲中飽經摯愛及兄弟離世，丹爺的面部表情起伏依然平淡，跟跛豪狂妄豪氣一面，有點格格不入。加上丹爺跟華仔均為角色後期配音，影響演出連貫性，再令兩位表現分數大打折扣，變相眾多雙雄對決的高潮場口，觀眾睇到的只是劉華繼續是劉華、丹爺就換咗個講潮州話的葉問，兩位各有各做，雙雄間的惺惺相惜，和兄弟鬩牆，二人都發揮不到應有的化學作用，甚無火花。

除了演技以外，導演控制場面調度，凝造戲中張力都對雙雄片非常重要。可惜今趟王晶的劇本太過貪心，要描述的場面太多，令整套戲節奏快得出奇，跛豪如何坐大及城府轉深，都只是草草帶過。現今的王晶，要拍得出雙雄對決，確是有點難度。

對於八十後的筆者來說，電影最亮眼是看到 1990 年代港產片御用奸角之一——吳毅將。

其咧嘴大笑，雙眼隆起，配搭其招牌笑聲，真是陣陣港產回憶湧上心頭——《弱殺》的超級變態佬、《南洋第一邪術》的咸濕降頭師、《強姦終極篇之最後羔羊》的高智慧色魔——我敢講因為吳毅將再演奸角，為《追龍》拉回不少分數（雖則今趟結局他的下場安排得有點草率）。其實吳毅將都有演技，當年在郭富城有份主演的劇集《廉政行動組》中於車內畏罪自殺一幕，演得相當出色，瀕死掙扎時，念掛自己心愛的女人，吳毅將演得真摯動人，21 年後，筆者依然記憶猶新。

平心而論，《追龍》不是爛片，至少劇本完整，美術服裝設計亦見心思，雷洛帶幾名手下勇闖九龍城寨一幕，亦拍得緊湊好睇。但整體而言，以「王三日」大導的水準，手執如此題材，及演員陣容，表現只可謂中規中矩，達標完成（至少電影確是描寫到港英時期的英國警察非常乞人憎，成功討好內地觀眾）至於好唔好睇，就睇你對王晶的期望有幾高了。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）