【紋身】救護員紋心電圖提醒自己仍呼吸　左青龍、右白虎已過氣

隨著時代轉變，紋身已不再是江湖人士的標誌，「左青龍、右白虎」圖案早已過氣，紋身師Karmen說：「宜家紋身無分咩職業，有教師、警察、消防、護士講得出都紋過，反而少接觸背景人士。」這些職業對紋身圖案的不同的要求，Karmen說最特別是有救護員借紋身提醒自己仍然活著，亦有老師籍紋身勉勵自己永不放棄：「有時聽下聽下，好似經歷咗好多個人生咁，人開始化了。」

閱盡生死的救護員及消防員其實也有感性一面。紋身師Karmen記得，一名任職救護員的常客前來，想在手臂上紋上心電圖，她說這個圖案為不少消防員及救護員等會用作記號：「佢就話自己每日見盡好多生死，之前又經歷一單大嘢，佢就紋左呢個身提醒自己要努力工作，因為佢想提醒自己呼吸緊。」

近年有老師疑因工作壓力自殺身亡，可見作為教師的心理負擔也不少。Karmen說有老師在的身上紋有勉勵字句，提醒自己要振作：「通常都係啲自我鼓勵嘅嘢，如never give up（永不放棄）嗰啲，勉勵自己。」

不少企業對職員有紋身都頗為抗拒，曾當過空姐的Karmen相當了解：「基本上除咗衫遮到嘅地方以外都有紋身嘅。警察就唔可以睇到啦！遮到嘅位啦！可能係背脊呀、腰呀個啲。」但她指會對部份未出身的年輕人會有較多提醒，「佢哋好多時想紋前臂手指啲易睇到嘅話，我就會提佢未搵到工，要知有啲工作會抗拒。」

忍痛能力女性較高

說起紋身，不少人會想到一個痛字。Karmen說她曾見過不少看來「大大隻」的客人，上色時痛得不支暈倒，如此痛楚，可否先服用麻醉藥？「我唔會prefer（建議）用麻醉藥、飲酒嗰啲！你可以食止痛藥，但麻醉藥同酒精就唔好啦！搽就更加唔俾，因為搽完皮膚無彈性，好難做（紋）。」據她經驗，普遍女性較男性能抵受痛楚。

聽過一段段的故事，Karmen直言如走過不同人的經歷「最令我感觸嘅都係生老病死嘅故事，對做人都有啲『化』，老土啲都要講，要活在當下。」