【何俊仁患癌】手術切6份1左肺　何：日內可返支聯會、律師樓工作

民主黨前主席、支聯會主席何俊仁早前驗出患上初期肺癌，日前接受手術切除肺腫瘤。他今日接受《香港01》電話訪問時指，手術十分成功，但要切去六分一左肺。他稱，目前需留在家休養，康復進度理想，「十日、八日之後都要出返去睇下支聯會、律師樓啲嘢」，惟短期內就不能出席遊行活動。
何俊仁又指，在癌症初期便發現及治理是「好彩」、「執返條命」，將來會更珍惜生命和親友。

現年65歲的何俊仁早前驗出患上初期肺癌，他今日接受《香港01》電話訪問時指，手術成功切去左肺上的肺腫瘤，而左肺約六分一被割走，他稱「之後會生返少少，但唔會還原」，日後要定期做肺復甦功能的吹氣運動，又指自己一直有肺哮喘，所以肺功能較弱。他指，現時只需食止痛和化痰藥，剛做完手術入睡和如廁都有困難，但現在情況已較好。他說，「有人引我笑就慘喇，因為好容易咳，做完手術喉嚨會有痰，一咳郁到個傷口就最痛喇！」他表示，肺癌是最常見的癌症，不知道自己患病的原因，而成因亦可以有很多，「我又唔食煙，壓力就咁多年都有，可能係空氣污染啦」，家人亦勸他減輕工作。

不過，他指當得悉自己患癌後，仍要為患癌的諾貝爾和平獎得主、《零八憲章》發起人劉曉波，組織集會和遊行，要求中共釋放劉曉波並讓他出國治療，之後才安排自己做手術。他表示，「十日、八日之後都要出返去睇下支聯會、律師樓啲嘢」，惟短期內就不能出席遊行，又感謝支聯會「戰友」幫手補位。

何俊仁又提到，平時都有做例行的身體檢查，但就沒有做深入全面的磁力共振，今次都是經醫生朋友建議下才做磁力共振，幸好發現是初期「執返條命」，又說「冇做的話，可能後期好多先發現，未必會冇命，但手尾都好長」。他感慨，「幾努力都好，都要安於天命」，今次自己是幸運避過一劫，「有老友比我不幸，如溫哥華支聯會主席周盛康、華叔(司徒華)就好遲先發現」。他說，今次經歷令他更加珍惜生命，又呼籲「機會一過就無，要珍惜眼前一切重要的東西，包括親情、友情」。他指，未來要多做運動減磅、食素食，調理身體，笑言「由一百四十多磅，廿年間變成一百六十多磅，都要減減磅」。