【肥妹戀愛】慶幸有能勁食十碟肥牛的女友　男：無理由為我減肥

網上組合「暗黑Twins」憑着將《女人味》改編成《肥西味》而一曲成名，自信唱出「Call me 肥西女神」。其中一位成員陳樂兒拍攝時體重達到人生巔峰——74公斤。她曾經被男同學戲稱是電視劇《肥田囍事》的女主角肥田。肥田當年有句對白：「點解肥就唔會有幸福？」問起樂兒，她依然有深刻印象：「即係肥田都可以搵到許志安，咁應該我都可以啩？」
攝影：吳煒豪

自小肥胖的她曾認定自己不會有戀愛的一天，直至18歲那年，身高162厘米、體重70多公斤的樂兒，遇上身高173厘米、65公斤的「許志安」，不介意她的肥腩和象髀，更是彼此的初戀，一直交往至今近5年。暗黑Twins的觀眾質疑這位男友的真實性，就如樂兒家人當初也講笑：「你咁都拍到拖？」。樂兒對這段緣份感到意外：「竟然喺我人生咁肥嘅時候遇到個咁嘅男朋友，唔嫌棄我肥，又唔嫌棄我拍片玩得咁放。」這些年，他們穿着同款同碼的男裝，一起瘋狂勁食，互相抱起對方：「佢同咗我一齊之後，佢話原來肥啲嘅女仔都幾好。」

自小是肥妹：可能我永遠都拍唔到拖

沒有「V面」、長腿的樂兒在中學時未有異性追求，男生亦只當她是兄弟，心想：「唉算啦，可能我永遠都拍唔到拖。」肥妹夠可愛，幸而成長中無人惡意攻擊她的身型，只是談到戀愛，還是認為與自己無份：「可能會有啲好肥啊、好大嚿嘅睇上我，靚仔嗰啲全部都冇我份，正常入眼嘅都冇我份，因為覺得男仔第一眼根本就唔會留意到我，就算留意到我都係因為我肥或者搞笑。」

補習天王聖誕Party遇上「許志安」

中學時期樂兒沒有奢望「出Pool」，中六備戰公開試，Kinson和樂兒是某英文補習天王的舉辦聖誕派對認識，Kinson就是坐在樂兒旁邊，讀男校的Kinson緊張地與樂兒打開了話匣子，「覺得佢幾得意。」曖昧教人時而興奮，時而不安；肥女子比一般女子更為不安，害怕男孩會介意自己的身型：「我同佢講，我真係好肥㗎喎。你鍾意我啲咩啊？」男孩不介意，回應她說：「外表唔係最重要性格最重要。」美麗的說話，是真心還是敷衍？

女神不同女朋友

Kinson坦言心中「女神」是Janice Man，「 因為嗰啲係女神級嚟㗎嘛，嗰啲叫可遠觀而不可褻玩。例如女神淨係想望，你唔會想掂佢，女朋友你係會想掂佢。」樂兒隨即接上：「但係你唔會想望佢。」Kinson誠實地回應：「都會想望嘅，但係冇女神咁吸引。」他還笑道，如果女神現在在樂兒旁邊，目光就會停留在女神身上。不用遮掩肥肉，愛都變得更坦率。

第一次約會　刻意遮掩象髀

公開試後，他們第一次約會。樂兒卻仍擔心Kinson介意她的肥肉，特地穿了黑色雪紡長裙，卻令樂兒走動不便，差點兒在樓梯跌倒。約會當天風雨飄搖，Kinson吐了一句一笑難忘的對白：「捉實我，如果唔係你會畀風吹走。」穩如泰山的樂兒被這位男生牽着，浪漫得來帶點青澀，兩位的初戀就這樣展開了。「出pool」不是肥人最難跨過關口，驅走自卑，坦然面對才樂兒面對的困難。放榜後，Kinson便去了美國留學。起初樂兒很擔心Kinson會見異思遷：「驚人溝咗佢，自己又唔係好靚。」本打算結束得來不易的關係，幸得Kinson誠意挽留。

「同對方食嘢係一件幾幸福嘅事」

拍拖生活中，「食」是最能見真章的一環。男人總是想得完美，女人胃口小又嫌掃興扮女神，Kinson說與肥妹戀愛，樂在吃得夠放。每逢暑假和聖誕回港，都會與樂兒在港勁食一番：「 一個星期一定會有一餐打邊爐、放題任食、燒肉任食或自助餐。因為佢成日覺得美國無嘢好食，所以佢返嚟嘅時候又係我哋最肥嘅時候。同埋同對方食嘢係一件幾幸福嘅事，因為有個人陪你一齊食。」不要以為樂兒的食量驚人，其實Kinson也不甘示弱，出街喜歡買全糖的珍珠奶茶，每次回港都拉著樂兒由午餐開始，下午茶、晚餐、宵夜缺一不可。

二人愛情長跑可有目標？有，起初以「吃得越多越好」為目標。後來目標進級，樂兒發現大家潛能無盡，就開始定下兩人吃放題要能吞下10碟肥牛的目標；兩人更會去譚仔「過橋挑戰」，一人一碗過橋米線。「跟住我哋見到隔離枱兩個人食一碗我哋可能會笑，夠飽架喇？」樂兒笑道。

一起穿同款同碼的衣服　男朋友：無理由要為咗男朋友去減肥

除了吃，還有一點讓情侶羡慕。要知道情侶裝不易找，他們慶幸能一起穿男裝中碼的衣服；時常買同款同碼的衛衣、冷衫、T恤、外套給對方。「有時唔想諗啊嘛，買完自己個件之後就求其買啲都係一樣㗎啦。」戀愛後，樂兒的腩肉與幸福度相對地增長，二人心靈與體重可謂一致：「我笑咗好耐，我好記得係你同我（體重）一樣嘅。」Kinson深知不可要求女朋友減肥：「即係無理由要為咗男朋友去減肥，去勉強自己。」 Kinson說，以前只可抱起樂兒不足10秒，樂兒卻能輕鬆抱起Kinson。

女朋友減肥14公斤：你唔好再減

然而，樂兒去年卻刻意減肥，「外圍嘅因素其實無咩，反而係自己想試吓瘦，沒有給壓力自己，打算失敗就放棄。」昔日的放題和過橋米線，換成蕃薯、烚蛋。樂兒成功減下14公斤後，Kinson從外國回來時，機場甫見面，他第一個反應就是：「你唔好再減啦！」原來Kinson擔心樂兒不再與他去瘋狂勁食，會逼自己也吃健康餐單。

減肥後，樂兒不如以往容易喘氣：「嗰時好易攰，（行街）個零鐘就要去Mcdonald坐下食杯雪糕。」他們仍有勁食，也多了新拍拖活動——行山。「佢以前嘉頓山係上唔到㗎。」Kinson說。

如果女朋友有日80公斤呢？

男朋友較喜歡瘦下來的她還是肥胖的她？ 「各有各好，都鍾意。瘦嘅話可以同我食多啲。」Kinson是誠實的男生，他坦言80公斤的女生還是接受不了，亦會擔心親友的看法。假若樂兒的體重升上80公斤呢？Kinson亦不會強迫她減肥：「隨遇而安，佢變咗80先算啦。佢鍾意陪住我，可能到時變咗會係我話我要減肥，跟住就拉埋佢去減肥。」

有人說肥女子不會有幸福，他說：「每個人都有佢哋嘅戀愛自由。」樂兒也說：「兩個人鍾意對方咪得，愛可以好簡單。」