香港引入卡啦OK第一人曾擁18分店 捱過獨家試唱競爭卻不敵沙士
「開第2間分店時，劉嘉玲和梁朝偉幫我剪綵。」卡啦OK場Big Echo老闆娘（劉麗萍）Apple姐憶述90年開K場的威水史。「當時剪綵太多人，黎明都行唔到埋嚟。」多年後她依然說得直率。
80年代香港還未有「卡啦OK」這個詞語，是Apple姐從日本引入。這個女人，眼大，野心更大，從帶起卡啦OK酒吧、卡啦OK店的潮流，她永遠是跑得最快的一個，曾是全行的領軍人物；她的手亦捧紅過容祖兒，可以掌控一首歌與歌星的生死。
上集：香港引入卡啦OK機第一人 一手包辦K碟MV 80年代年賺七位數
受日本時鐘酒店啟發 辦多房式卡啦OK場
80年代，她一手帶起的整個卡啦OK酒廊潮流，卻越演越複雜。某次她到日本工幹，酒店爆滿，卻租了時鐘酒店。她發現原來房間裏面可以唱K。於是，她將這個概念放進卡啦OK場中，1991年在尖沙咀開設第一間Big Echo，就是我們現在熟悉的K場形式。
Big Echo（第一興商）原本是日本一間經營卡啦OK系統器材的公司，售賣器材給酒廊和鐳射碟。當時Apple姐欲取得第一興商卡啦OK器材的代理，「我打電話畀個老闆，日本佬話嚟到香港會揾我。我心諗等得你嚟都畀人截咗糊。」情急生智，致電其秘書，訛稱「我約咗你老闆接佢機，但唔記得佢坐邊部機。」他問友人借了一架勞斯萊斯，印了一幅很大很大的橫額去接機。第一興商老闆不虞有詐上了「賊車」去飯局，「我擺咗幾圍，佢已經入咗我嘅局。」原來他吩咐了旅行社來接機，「食飯時佢先知我唔係旅行社。」一場飯局，還促成Big Echo加入Apple姐的卡啦OK場。
人龍排四個鐘 顧客日唱10小時 高峯期18間分店
香港第一間Big Echo參考日本K場的模式，房間很小，只有兩個人能坐進去。位於尖沙咀的K場面積逾7000呎，與現時的旺角分店相約，不同的是當年分成30多間房，今天只有9間。房間各有不同主題，如巴黎風光、東京鐵塔等。不出三個月，卡啦OK店排滿長龍。那時其弟友人托她預約房間慶生，出動人情牌還要排兩小時，友人竟來道謝：「好好㗎喇，平時要排四個鐘。」她才知人龍有多誇張。
她說，香港沒有其他K場，又沒有什麼平價的娛樂，「冇手機，咁早返屋企都唔知做乜。」有律師客人經常來Ｋ場蛇王，還說：「又平，又有冷氣，咪嚟瞓吓。」，「很多客人由朝玩到晚，中午12點開門，11點就開始等；有啲唱十個鐘先走，好似返工咁返。」第一年便賺了1800萬。第二年開分店以「唔使再排隊」作宣傳口號，「其實都要排，排到第四間分店都要排。」第二間分店開張，還找來劉嘉玲和梁朝偉任剪彩嘉賓。高峯時期，她坐擁18間分店。
發掘容祖兒 《好心分手》日播夜播捧紅盧巧音
90年代卡啦OK場可以掌控一個歌手的命運。1995年容祖兒勝出Big Echo歌唱比賽，是Apple姐第一個力捧的新星，容祖兒粉絲都寫信來答謝她。Big Echo12周年在郵論獅子星號辦宴會，各大歌手、唱片公司到場齊撐，還頒了一個最高點播率獎項給陳奕迅。「當時盧巧音仲係新人，佢見到我話個獎好靚，我話『見你咁乖，下次到你啦！』」於是Big Echo 走廊、廁所、接待處全部都在播《好心分手》，「點歌與歌之間，有空隙全播《好心分手》，成間嘢都《好心分手》，唔到你隻歌唔紅。」2002年，這首歌獲得9個歌曲獎項，還獲得白金唱片。
《越吻越傷心》開「獨家試唱」先河 行業為版權爭崩頭
98年，蘇永康的《越吻越傷心》是整個卡啦OK行業第一個轉捩點。唱片公司開價40萬將獨家試唱權賣給加州紅，「造就加州紅搞獨家試唱」。「我估唔到佢首歌咁紅。我份人硬頸，我唔畀錢，唔後悔。」Apple姐說從前大家的想法都好單純，無論是版權費、每年電台一千萬的廣告費，根據各公司K場房間多寡按比例瓜分。「總之有歌齊齊唱，先會百花齊放。」她遂帶領其餘公司如嘉禾、Neway、活力、Topone、Energy等組成「大聯盟」。「八國聯軍打加州紅。，我哋差唔多逼到佢放手，點知死人Neway走去加州紅陣營打返我哋。」Apple姐憶起當年一戰已沒有怒火，她還在笑，像述說一齣事不關己的電視劇。「啲歌曲版權費炒到貴晒。」
千禧年，英皇娛樂開價5500萬元，讓唱片公司買起全公司所有歌。「我有，但我唔忿氣，唔容易揾得返。」那晚她睡前還想：「本身都諗住唔要，算啦！」翌日醒來她才猶豫：「佢個deadline係一點鐘。 我諗諗吓冇啲歌好大鑊，打畀拍檔商量。」拍檔問：「如果全香港嘅歌你要買晒要幾錢？」Apple回他：「2億。」拍檔：「2億就2億。」Apple姐立刻致電英皇老闆楊受成：「佢上緊機，叫我打畀吳雨大哥。但佢電話打唔通。」一點半，吳雨回電，已經與Neway簽約。
此系列其他相關文章：
【我是歌手－上】K-lunch爆滿情景不再？K歌之后：K場不可取代！
03年沙士生意慘淡9個月 傾家蕩產
這一役還好，誰知03年掀來一場沙士。「我仲同楊受成講：『多謝你喎楊生，幫我慳返幾千萬，𠵱家有歌都冇用。」董太穿生化衣上電視，宣佈香港成為疫埠那日，她到了馬來西亞開會。當地拍檔說會議取消，就連搭的士也要說國語「扮唔係香港人。」那夜下了一場很大很的雨，張國榮從酒店跳下來，「嗰晚我好記得，晴天霹靂。然後，捱咗九個月，捱唔到，傾家蕩產。」
後來其實還有一個機會，玩具大王蔡志明願意花兩億讓她捲土重來。「我話一搞就要十萬呎大舖，諗住『一個航空母艦炸死佢』！」這個女人的野心，從小便大得可以吞下一頭獅子。但蔡志明說舖位要用買的，不肯租。「大舖位好難買到，揾揾吓我都冇心機。」那時剛巧友人離世，感觸良多，「我當時已經40歲。我只係佔少少股份又要捱餐死。捱完又點？我已經做咗卡啦OK 18年。18年後又變返咁？所以寧願休息，做自己細個想做但未做的事情。」她說自己信佛，信那些「咩都係空」的道理，輸了幾億，她真的沒有哭過。哭，卻是後來的事。
下文再續。