香港引入卡啦OK機第一人　一手包辦K碟MV　80年代年賺七位數

「開第2間分店時，劉嘉玲和梁朝偉幫我剪綵。」卡啦OK Big Echo老闆娘劉麗萍（Apple姐）憶述90年開K場的威水史。「當時剪綵太多人，黎明都行唔到埋嚟。」多年後她依然說得直率。
80年代香港還未有「卡啦OK」這個詞，是Apple姐從日本引入。這個女人，眼大，野心更大，從引入卡啦OK機、卡啦OK酒廊到卡啦OK場，她永遠是跑得最快的一個；她亦捧紅過容祖兒，可以掌控一首歌與歌星的生死。

偶遇神奇盒子 全港第一人從日本引入

Apple姐原本在黃頁做廣告銷售經理，23歲便自立門戶開廣告公司。某次到師兄的公司談生意，看到一個很有趣的盒子。「我問他是什麼來的，他說是卡啦OK。我還問『卡咩嘩？』」80年代香港還未有「卡啦OK」這個詞語。師兄說：「唱歌㗎，你試吓！」盒子原來有一個名堂，叫八軌帶卡啦OK（karaoke）機，將卡啦OK碟放入機內會播放音樂，卻沒有畫面，要自己另外看歌詞唱。唱歌的時候，盒子還會「閃吓閃吓」，「唱完又會畀分你」。師兄問Apple姐：「日本人叫我同佢做呢個生意，你有冇興趣？」

1986年，二人就在北角城市花園商場開舖賣卡啦OK機。全城獨市，零宣傳，客似雲來。「香港以前，你做一樣嘢好容易，唔使靠街客，一個介紹一個。」飛圖唱片老闆葉志銘、張德蘭等明星都來捧場。後來日本開始流行鐳射影碟LD機，她又進貨，「以前香港得國語碟外語碟，唱嚟唱去都係《Love Me Tender》。」

有機但沒有卡啦OK碟  自行購買日文改編廣東歌版權出碟

她誓要出版全港第一隻廣東卡啦OK大碟。她想到有很多廣東歌改編日文流行曲，於是主動找日本寶麗金合作，人家給她公司的音樂庫，她每天邊工作邊聽歌，把有改編成廣東歌的挑出來。「第一張碟歌全部都係我揀，好辛苦揀咗28首，好記得有《忘不了你》（譚詠麟）、《痴情意外》（陳慧嫻）、《貪貪貪》（陳慧嫻）、《讓一切隨風》（鍾鎮濤）、《風繼續吹》（張國榮）等。」至於那些中文字幕，是人肉按節拍上色。「賣千幾蚊一隻碟，我試過一日賣過千隻。」

當時唱片公司連版權都不知道什麼一回事。Apple姐自行找律師做顧問，又參考美國的法例，「通常100蚊美金，我話『你收呢個就啱㗎喇！」她又買了寶麗金、華納、華星等唱片公司很多歌的版權，「慢慢等住出碟。」後來飛圖有樣學樣出卡啦OK碟。「佢哋冇買版權，後來才有版權條例，飛圖都只係賠咗幾十萬，早知我都賠，我買版權點止幾十萬。」

向華勝替她找來王晶執導MV：「李嘉欣、劉德華、叻哥、張敏幫我拍MV，以前好犀利。」後來唱片公司才自製MV，「最衰湯正川　（前華星唱片公司總經理），佢揾嗰啲『環宇風情』片，唔使揾明星做ＭＶ。後來寶麗金就揾歌手自己拍返MV。」

此系列其他相關文章：

開設全港第一間卡啦OK 酒廊「大亨廊」

「後來我開始諗，把卡啦OK機推去piano bar。」Apple姐說。80年代香港很流行piano bar，琴師伴奏客人獻唱。但當時Piano Bar都好保守，「佢哋就嫌，『唔得嘅，一定要有琴師嘅。』」Apple姐的眼光永遠放得很遠，遠得別人望不及，跟不上。無人敢買，她便將卡啦OK機租予disco club。當時卡啦OK機不如現在的有伴唱功能，又沒有琴師遷就客人的節奏，「於是7000元月租包埋一個DJ，幫佢揀歌，又幫客伴唱。」

她遂在銅鑼灣開設第一間卡啦OK店「大亨廊」給行家做示範，無人再敢說她癡人說夢。2000呎空間，一個舞台，一個openbar賣小食和酒水，可以坐50多個客人，每晚爆場坐無虛席。客人寫紙仔點歌，輪候上台。從前香港人的面皮厚過黃頁，「佢哋唱得好屎，又覺得自己好勁，唱得好大聲。明明MV已經去到第三版，佢仲唱緊上兩版。」

當年港人愛一支公唱K   為客人鼓掌是員工責任

Apple姐要求員工任何情況都要像海獅般鼓掌，掌聲欺哄過不少人。「當時我同一位女同事同住，半夜她夢遊還起來拍手掌。」Apple憶述時還笑到反肚。她說這種卡啦OK Bar的模式，反而不怕「一支公」，從前有個公務員客人，一年365天每天都來。「同K房唔同，你一個人落嚟一定有腳，好玩好多。𠵱家啲人唱K你有你唱，佢有佢傾偈。」她懷緬大亨廊的歡樂，那又紅又藍的彩燈，「𠵱家每逢周五我都在Big Echo大band房，請琴師同朋友都聚腳。」現時銅鑼灣新店亦準備試行當年大場演唱的模式，「咁就唔使要多人先可以book房，散唱也可。」

當年有客人為爭先上台，有人出錢，有人「響朵」出盡招數「賄賂」Apple姐。「啲人話自己跟邊個大佬，邊個橫頭。我話『你望吓嗰邊，嗰個話自己跟咩哥，呢枱就係警司，個個都要我畀面。』」任何人她從不賣賬。有晚兩人發生口角，翌日有個古惑仔上來領功說：「昨日單嘢，我帶咗50個兄弟嚟幫你擺平。」Apple姐明知他上來收錢，心想：「嘩，每個兄弟比一百蚊都唔得掂。」拍一下枱，先發制人，直罵他：「咩打交啫，人哋嘈兩句之嘛。我個場坐得50個客，你帶50個人嚟拆我場啊？以後唔好喇！」古惑仔如喪家犬敗走，「其實我不知幾驚。」

出售卡啦OK機年賺二千萬

大亨廊的成功，人人都爭相仿效，卡啦OK場開滿全城，Apple姐的卡啦OK機就賣得更好。「大亨廊每月只賺6、70萬，志在做demo。我日頭賣機，又賣畀電器舖，每年賣機嘅生意都有二千幾萬。」

近年有人說唱K文化沒落，Apple姐笑言80年代已有傳媒問過她。「當年因為其他卡啦OK店好多人打交，變得好複雜，有人問我怕唔怕會沒落。」她始終深信唱歌是老少咸宜的娛樂。從卡拉OK酒吧到91年引入日本包廂房間的卡啦OK店，高峰時期坐擁18間分店，後來不敵沙士輸幾億離場。現在年過50，她仍眷戀這個行業，重開Big Echo。

這廿年來的起跌，下文再續。

下集：香港引入卡啦OK第一人曾擁18分店   捱過獨家試唱競爭卻不敵沙士