【畸‧歌詞】「忘記我不要緊 誰鬆手我握緊」 其實你只係愛自虐
最近唔少女仔「帶埋」(絕對唔係逼！)男朋友入場睇《原諒他77次》，其實都幾睇唔慣周柏豪嘅角色。話晒佢都係兵歌之王，見到周柏豪就自然諗起佢喺《六天》、《夠鐘》、《Smiley Face》入面有幾慘。不過又不期然令人諗起，其實男仔有時都幾無辜，周柏豪係戲中做衰人(雖然我唔覺得有幾衰) ，就畀一眾女士們唾罵。但諗返起佢啲兵仔歌，其實做好人又唔見得可以得到女士們嘅歡心喎，甚至乎會覺得做兵好變態添！
咁多隻「柏豪兵歌」入面，最痴線都莫過於《Smiley Face》。歌曲開頭一句「還想邀請我 分析他個性」已經講咗女神係有心儀嘅對象，你硬係要衝埋去都唔緊要，但你又要「無法對應 最後我交出了 A Smiley Face」，咁咪就係無性格囉！做兵最大嘅徵兆就係無個性，真係講句抵你做兵嘅！
不過，講到最過份始終都係副歌部份「忘記我不要緊 誰鬆手我握緊」，係呀係好浪漫呀，但做水泡做到自得其樂係咩玩法呢？話就話「忘記我不要緊」，但係又要期望人哋感情不穩會返嚟你身邊，咁你係想人哋忘唔忘記你呢？黑心之餘又一時一樣，精神分裂咩？
話就話所有付出都只係希望搏得紅顏一笑，懶偉大咁話「亦不想 貪一吻 只想到某日當你寒冷 做你熱能」「給欺負了 擁著我哭」，其實你腦海入面咪又係FF緊可以將對方一擁入懷，唔好話比我聽你無諗住有下文呀？幻想咁多，將自己搞到成個悲劇人物咁，其實係你細膽呀？定係你純粹鍾意自虐呀？
講到最尾終於露出孤狸尾巴「I wish I could be more than just a friend」，原來之前講乜都假，結果都係想同女神講：「係呀，我係想追你呀，不過你之前鍾意其他人我咪放棄住先囉，而家你係咪OK呀？你OK我隨時Ready架！」喂男人老狗唔好咁核突啦，你估女神聽到會感動流涕定係會質疑你係咪真係鍾意佢呀？其實鍾意人咪講囉，乜都話無所謂，讓讓下就一世架啦，唔通你諗住做兵真係可以拖到女神隻手咩？