李克勤個唱再現「絕望座位表」　加兩場止血：睇我唔使坐咁前

李克勤現身尖沙咀酒店，為9月的《李克勤慶祝成立30週年演唱會》舉行發布會，即席宣布演唱會再加開兩場，他又笑言昨晚和爸爸慶祝父親節時，被阿爸藐：「因為我冇飛，只能給到他$480的票。」話雖如此，今早公開發售時，網上流傳演唱會的「絕望座位表」，四面台、1萬4千個座位，居然只得兩成可以買，網民形容好似私人派對一樣。對於此事，克勤直言覺得好矛盾：「因為內部好多人買，所以少了公開發售，但其實$480票都幾好睇，睇我唔使坐咁前。」英皇方面就解釋座位表只供參考，並不是每場都有同樣情況，而且因為演唱會反應好好，所以頭尾都加場。

提到演唱會會找誰做嘉賓，克勤就只肯表示會是重量級，主持雲妮繼續追問老婆兼前港姐盧淑儀會否帶后冠上台賀一賀克勤入行30周年時，台下居然有人大叫：「著多次泳衣！」克勤聽言即時紅到面晒話：「本來帶后冠都仲諗諗，著泳衣就唔好喇，幾十年前都蝕咗次啦，再蝕多次唔好喇，實不相瞞其實我介意啊！」

主持又再問克勤情願太太著泳衣，還是在演唱會上跳《舊歡如夢》，克勤即說：「你都癡線㗎，做Live時居然有人點這一首，到時我搵個新版本，哪裏跌到哪裏企返起身。（即場跳一次啦！）唔好喇，趷得高又唔好，趷得低又冇個味道。」

發布會上，克勤又收到英皇為他準備的黑膠和訂製郵票，克勤見到郵票時笑言回去給兩個仔仔睇可以連郵票是什麼都不知道。講到今次的演唱會名字，克勤自言其實和好多人一樣，都好疑惑為什麼是「成立」：「我才疏學淺，就走去問做嗰個啦，林海峰話李克勤係個品牌嚟㗎嘛，啲人問咪由佢問囉，依個年代有人問問題係好㗎嘛。」