【亞洲星光大道】安俊豪簽約被轉做主持　捱8年改埋名先做到歌手

無綫有「豹哥」，原來亞視都有個「豹哥」陳蕾。《亞洲星光大道》都算係80後的回憶，畢竟當時並未有很多大型的音樂比賽出現，加上台灣的《超級星光大道》興起，故此令人印象深刻。雖然當年簽約亞視，並唔代表你有機會做歌手，不過當時的確唔少選手都揀選了亞視。唔講唔知，很多人在亞視的生涯，都係轉型做主持。事隔多年，這班選手不得不接受現實，如果對音樂仲有熱誠的，就要自行打拼，其中一位就係當時被稱為「小王子」，又或係「翻版羅志祥」的李志豪，點解被稱為羅志祥？事關他當年跳舞非常了得，又試過在街上被認錯做羅志祥囉！

從以下圖片和視頻可見，安俊豪的可塑性其實好大。

李志豪做了幾年主持後，就輾轉到台灣參加歌唱比賽，希望再次重踏音樂圈，可是因為與亞視仍然有約，而無法在台灣電視台亮相，甚至為了生活，在香港做過售貨員過活。上年改名為「安俊豪」再戰樂壇，雖然加盟的不是大型唱片公司，但細公司或許會更有彈性，彈性到畀機會他到韓國參加大型的選秀節目《Produce 101》，不過因為唔識韓文，最終被電視台剪剩1秒鏡頭。

Simon接受查詢有關《Produce 101》特訓時坦言：「其實籌備咗近半年，一開始叫我參加好開心，但同時好擔心應唔應付到，每星期都要做功課，學跳舞或唱韓文Cover，當時好折磨，最後交晒所有功課，2分鐘韓文自我介紹都交埋，收到消息要去韓國時腦海完全空白，總共去咗18個鐘就返來香港。」原來《Produce 101》面試就如座談會一樣，要各自Present，由於練習生都是韓國人，因此Simon只能坐著聽他們對話。節目的PD安俊榮見狀，用英文問Simon，為何在香港做歌手都要赴韓做練習生，他回答：「我好想令自己進步，好想參加特訓，我對韓國文化由零開始，到現在的認識，可見到我每集都會有進步。」結果Simon又有2個星期的「觀察期」，每日學韓文之餘，更要用韓文拍片，可是韓文水平仍未能應付節目需要，最終未能取錄。「聽到後我真係喊了，用半年時間在呢個節目，最後都唔ok，真係好慘，不過都值得嘅。」

就算得1秒鏡頭都冇乜所謂，因為他其實唔介意別人的看法，只在乎自己在過程中得到什麼，點解咁講？聽他的新歌《怪人》就會知道，歌曲叫大家接受自己，就算能力或成績與人不同，只要自己過得快活，又有什麼所謂呢。

今次呢首歌才算係安俊豪的「親生仔」，由他一手策劃，就連MV拍攝都要負責，佢透露MV拍攝場地是荒廢的大廈內拍攝，現場全被紅色的燈光包圍，曾經被管理員查問添。今次他又用上紅色營造詭秘的效果，唔知呢隻紅，又可唔可以令佢大紅紫紅呢？

《怪人》是安俊豪首次作曲，填詞方面交由鍾晴負責，歌曲講述「怪人」被定為異類，只是所走的路與大眾不一樣。聽眾若感到孤立無援時，可以想想，其實世上都有好多人與你一樣，你一點都不孤單。