【畸．歌詞】「由這一分鐘我一生就只有你」　呢件事真係好恐怖！

唔少以愛情為題嘅廣東歌詞聽落去都令人「冧滋滋」，尤其男歌手主唱嘅情歌，好多都係講「我有幾愛你，我無咗你唔得」嘅綿綿情話。林子祥《分分鐘需要你》當中嘅歌詞寫得好，「你似是陽光空氣」，要不是鄭國江將呢個咁露骨嘅想法包裝得咁好，諗落成件事都幾痴漢。入返正題，廣東歌當中，詞人應記唔止一功，而係好多好多功，因為佢哋往往都可以將一啲好恐怖嘅想法，包裝到大家聽到都覺得受落，尤其女士們更加會聽到濕了眼眶。但係各位男士們，停一停，諗一諗，睇真啲歌詞，其實當你唱比你嘅女伴聽，而佢又聽得如痴如醉，但最終你根本又唔可以好似歌詞內容咁浪漫嘅時候，隨住劇情走向，你哋分分鐘為自己設計出最完美嘅陷阱。

其實有啲歌唔係個個人都有資格唱比伴侶聽，你本人如果唔係咁浪漫嘅時候，你女朋友真係會好失望。唔信？我唔直接答你，我用例子答你。好似側田嘅《三十日》咁，劈頭第一句就係「逐晚倒數為見你準備」，嘩吹水就係咁講啫，咁得閒逐晚倒數，逐晚去準備？你估你睇緊「電車男」咩？搵一晚唔洗OT都偷笑啦！到你女神發現你為左準備見佢而失去咗一個晉升嘅機會，你估佢嗰刻會諗啲咩？唔洗講都心照啦。

去到副歌，最動人嘅一句「由這一分鐘我一生就只有你」更加離譜。係，我承認男人專一起上嚟，真係會希望24小時都陪住女神。不過作為女神嘅你有無諗過，「由這一分鐘我一生就只有你」呢句唔係個個人都做到架！除非呢個男仔好似華英雄咁，命犯天煞孤星，咁你就可以期望一下佢一生就只得你一個嘅，不過到時你可能要為自己祈個禱先，呢個人注定冇「父幹」架喇喎，而且...免得佢最後都仍然係天煞孤星。其實當你唱完《三十日》比女神聽，萬一佢問返你：「吓？你約我之前唔準備架？你又話你一生淨係得我一個嘅？點解我搵你陪我你又唔得閒？」你可以點答？唔通你話：「其實句歌詞都係打個比喻啫。我當時嘅意思係話我心裡面只有你一個，不過其實我都要同阿爸阿媽食飯，要聽下兄弟訴苦，上司叫我開OT我都無得拒絕嘅。你會體諒我架可？」

好！我又當你話講錢庸俗。講返啲浪漫嘢「只想可擁著你 然後吻你 讓你驚喜」，喂大佬，你估咁就叫浪漫架啦？咁頂多都只係男人嘅浪漫啫。女神同你講浪漫，你唔係好似張志明咁搞返場大龍鳳追返余春嬌都唔算浪漫啦！聽都聽得多啦，浪漫少不免要用錢堆砌，唔買返紮花、Book返間高級餐廳燭光晚餐、再直落食返件Lady M，唔通真係陪你食譚仔行公園咩？比日資公司收購咗唔代表高級架，唔好咁天真啦！如果你單純到覺得每次出街就「擁著你，吻你」就叫做驚喜，我真係勸你返屋企。

最出事其實都係去到「遊歷世界讓你驚喜」呢一句，下巴輕輕懶浪漫嘅一個承諾，往往換來萬劫不復嘅後果。講真，正常人喺香港打份工，我當你兩萬幾三萬蚊一個月，幾個月去一次日本都無乜問題嘅，不過你預左唔好貪小便宜買平機票，一陣畀人掟落機打到流鼻血就GG。你生得矮冇乜所謂，生得高又坐得辛苦，未出發就一肚氣。

好喇，講到遊歷世界，就真係要環遊世界，你去親都東亞地區，再唔係就返大陸，你個世界唔會得咁細掛？去歐洲雖然話可平可貴，但斷估都唔會晚晚住民宿、餐餐食麵包啦，到時你只會變成喜記老闆，走出嚟大叫「那有錢？」，就算你頂得順，重點係，冇假！轉個頭你女神同你講：「你唔得閒呀？Adrian話請我去馬爾代夫玩喎。」咁你只能夠同自己講：「帽事嘅！」

去旅行就預咗儲唔到首期啦，冇樓又唔夠「興奮」，回歸現實把啦。

所以話，有啲歌真係唔係人人唱得起，除非你係一個富二代，得閒就返Daddy間公司幫下手，阿爸阿媽就工幹多過食飯，朋友個個都喺外國發展，得閒先返嚟聚下舊，最好有架私人飛機，想幾時飛就隨時飛。咁你就可以試下唱呢首歌去氹你女神嘅，不過送歌黎講，送錢可能仲實際。

奉勸各位女士聽到男伴聽住呢首歌都唔好太多幻想，歌仔呢家嘢真係聽下算啦，其實男伴為你花盡心思，唱歌比你聽都係為咗搏得紅顏一笑。如果你聽完真係以為「由這一分鐘佢一生就只有你」，我只能夠講一句：「你唔好咁天真啦，你估男人真係唔洗返工咩？」