姜濤演唱會｜林海峰驚喜現身任嘉賓 讚姜糖先係「用作品說話」
撰文：邱愛霖
出版：更新：
MIRROR人氣王姜濤首個個人騷今晚（2日）於亞博舉行，演唱會中段大熒幕播出影片，片中姜濤模仿姜糖在銅鑼灣舉牌，體驗姜糖應援，大呻辛苦的他自嘲：「姜濤真係好乞人憎呀！」姜濤於片中落淚表示覺得對姜糖有虧欠，他說：「我望得你哋太少，因為我冇自信，唔知點面對大家，我要再同大家緊密多啲，由呢一刻開始將你哋變成我生命中一班屋企人。」
及後演唱會又重溫叱咤姜濤首奪「我最喜愛男歌手」片段，當晚頒獎嘉賓林海峰驚喜現身，他笑指姜糖購買姜濤代言的所有產品，才是最該得獎的人，他說：「頒個獎畀姜糖，你哋真係用作品說話。」
林海峰又指姜糖30幾度高溫都要在商台門前等姜濤，更令商台因而要換大閘，「我返晴朗做節目，我已經最早㗎啦，但佢哋早過我返晴朗，最近商台因為姜糖換晒鐵閘。」他又稱呼姜濤「銅鑼灣揸fit人，大佬B，姜B」，又鼓勵姜濤繼續努力攞獎，「頒完獎畀你覺得我人氣高咗好多，事業新高峯呀！」姜濤聽後只尷尬傻笑，林海峰離台後姜濤笑指：「佢一嚟就轟炸我講唔到嘢。」並感謝林海峰鼓勵。