【專訪】孫耀威極愛陳美詩　兩夫妻要零秘密：結婚就應該合成一體

一個充滿迷團的男人，究竟他的創作靈感來自哪裡？為什麼他做生意蝕完一次又一次，也未有打消創業念頭？他是如何「營運」8年的「愛情長跑」到成家立室？他就是「凍齡男神」──孫耀威。
攝影：梁碧玲
化妝：江中平@江中平化妝室
髮型：Sunny Yu@Hair Culture
服裝：TUXEE 高級訂製工坊
場地：tuxee.co

「人生第一次不再蝕錢喇」

孫耀威在愛情路上修成正果，但在生意上似乎處處碰釘，數年前Eric分別在台灣及上海投資開cafe及酒吧，可惜蝕完一次又一次，但Eric依然抱著「大無畏精神」，在香港開設西裝禮服店。對於生意屢敗屢試Eric表示：「我覺得做生意係一個可以「發洩」我創意嘅地方，我無論喺洗手間「開大」或者發夢嘅時候，都係諗緊設計服裝嘅概念。雖然我以往曾經失敗過好多次，但今次嘅服裝店生意係我人生第一次唔再蝕錢嘅生意，今次真係要感謝主。」

「佢根本係我肚裡面條蟲」

問到孫耀威如果要用一首歌來形容太太時，佢表示：「其實過去咁多年，佢一直都同我好近，無論出專輯，拍戲，做生意都一直喺我身邊。其實每一首歌都有Macy 嘅腳毛（難怪佢隻腳咁白滑啦），就算我想作嘅歌咩topic都好，或者係MV都會比唔同嘅意見。咁當然佢係我肚入面條蟲，所以好多意見係好「啱」。過去8年每一首歌都有我同Macy 嘅回憶，每一首我都會諗起當時我同Macy 發生過嘅事。所以我唔可以用一首歌嚟形容，而係要用所有嘅作品先可以形容到。」

「我唔想冒險同佢發展一段Long distance relationship」

孫耀威多方面發展，為工作要經常周圍飛，要維繫8年愛情到成家立室係不容易嘅事，究竟Eric點樣經營呢段感情？Eric：「過去我同Macy都幾多時間一齊，特別是後期，我要求佢辛苦少少陪我一齊飛來飛去。因為一段感情如果要成日分開兩地係比較難去維繫，所以我唔想冒險同佢發展一段Long distance relationship，而且有佢喺我身邊真係會有一個無型嘅支持。你可以話我黐身，但我覺得絕對係一種精神上嘅寄託。」

「我地係零秘密」

當問到Eric與太太相處時會唔會互check電話，佢就表示：「其實兩個人結婚就應該合成一體，所以基本上我地係零秘密。銀行，email，所有password(密碼) 大家都共用，其實求都係求咁樣嘅關係。好多人話兩夫妻要財政獨立，要有自己嘅生活，有自己嘅秘密，我就反而唔係好buy，我自己就覺得守秘密好辛苦，個人開始老人痴呆，太多秘密要記，想多一個人幫手記下就反而少啲壓力，呢個就係我嘅愛情觀。」