【多圖】容祖兒尾場感觸哽咽：其實我同十八年前一樣無變過
天后容祖兒合共17場《My Secret Live》演唱會昨晚於演藝學院正式拉下帷幕，Joey全場情緒high爆，除了多次興起唱到眼濕濕外，唱到《出賣》還差點在舞台上跣倒，還好她下盤夠穩。中段全場大合唱《心淡》環節，幾乎個個歌迷都開口合唱，就連台下英皇老闆楊生亦參與其中， Joey笑言：「大家有冇係K房唱過呢隻歌？楊生你做咩舉手，你係咪真係有唱過㗎！」
因為今場是最後一場，所以Joey都份外感觸，她向大家剖白她做這個side track演唱會的初衷，她說「做呢個騷嘅原因本身係諗住自己開心，當係自己嘅禮物，歌迷又會開心，開過好多次紅館都未必有機會唱呢啲歌，好多謝公司同老闆投資咁任性嘅演唱會，做完呢個騷發現遠遠超過自己以為只係開心呢樣野。」有很多朋友都來看過她這個演唱會，然後他們跟Joey說這個騷很不「容祖兒」她不禁哽咽跟大家澄清道：「我想同大家講，其實我冇唔一樣，呢個容祖兒同18年前一樣，但係而家係成長版嘅容祖兒，因為佢仍然好多甩漏，但學識打完場，仍然好『甩咳』，但知道點收番個尾，仍然好九唔搭八，但得體咗啲，呢啲係我唔知嘅，係你哋話番我聽，多謝每一位觀眾睇完個騷，話我聽你哋好開心搵番最想見到嘅容祖兒。」
Joey特別鳴謝一直在她身邊的天使，她指媽媽比她在台上演出更累：「佢騷前騷後都冇同我講好多嘢，但佢等我返到屋企會幫我精心準備宵夜，又準備一盤熱水浸住我晚晚著高踭鞋嘅腳，我媽媽真係最辛苦，因為佢呢幾年都同病魔搏鬥緊，每一日都好辛苦，但堅持嚟睇我，佢睇得好開心，我都好努力令佢睇得開心，希望以後每次演出佢都睇到！」
她回望自己走過的路並不平坦，她回憶出道頭一兩年曾自薦過兩間唱片公司，但都遭到拒絕，她說：「唔止，我細細個已經嚟過演藝，嗰陣我係嚟面試參加香港兒童合唱團，我當時係沙田兒童合唱團，但我唔甘心係淨係喺沙田唱，我係同祖藍一齊嚟面試，結果係佢入咗我落選，點估到廿幾年後嘅今日喺度開到17場演唱會，多謝大家將我由滄海遺珠變成掌上明珠。」全靠Joey把握每一次的演出機會，有次在中學演出時唱了陳慧琳的《一切很美只因有你》，讓她得到賞識，最後更可以紅館開過8次演唱會，機會是留給有準備的人。
來到最後歌迷最緊張的點唱環節，連續抽幾首都是國語歌曲，Joey笑言：「搞咩，全部都國語歌，今晚係自由行之夜？」期間抽到不少歌迷寫了很偏門的歌曲，就連政府的宣傳歌也有人點唱，認真搞笑！其中有一個歌迷大膽點唱師兄的歌，令Joey尷尬非常，Joey讀出點唱紙：「我覺得祖兒個人傻傻哋，有啲思覺失調，喂呢隻唔係我嘅歌嚟㗎喎，其實呢隻歌又真係幾好聽嘅。」之後 Joey哼了句：「真係極危險連思覺像也失調。」粉絲應該收貨了吧，最後雖然連續點唱了7首歌，但演唱會還是熬不過十二點，最終在 11：57分完場結束。
完騷到後台做訪問時，Joey形容自己感覺很空虛，因這次演出籌備的時間太長，但未來得及消化已完騷，感覺很「思覺失調」，那為什麼不在台上唱這歌呢？她回答道：「我唱咗兩句囉，係導演話唔合符標準，我好想唱㗎，歌詞都搵埋出嚟，但導演嗌停。」今晚師兄亦有到場支持，不過不是在幕前，而是在後台，做Joey背後的男人。Joey媽媽曾經患癌，這段期間一直都有在服藥，但媽媽再累亦未有缺席任何一場演唱會，她說：「佢一路食緊藥，啲藥會有好多副作用，每晚見佢嚟支持我，但對佢嚟講消耗好多體力，佢會話唔攰，但我完騷之後覺得佢瘦咗，同埋覺得佢身體虛弱咗，所以完騷之後佢都應該好好休息一下。」Joey預告月底將與媽媽到日本旅行，好好放一個假期輕鬆一下。