【誰明做Gym心】張繼聰改歌詞撐肌男 網民：漏咗《舉鐵街》
講起張繼聰呢，大家都會記得他在《老表，你好hea！》飾演的爆肌男Mario，勁到連舊肌肉都有戲，自始之後阿聰就主力在戲劇上發展，但無論戲有幾好，千祈唔好唔記得阿聰的真正身分係一個唱作人！
話說早排阿聰操肌時，心血來潮影低Gym Room的相放上Instagram，再寫了幾句惡搞歌詞「舉鐵大過天」、「想和你去推推胸」，藉此勉勵一下各位「同是天涯淪落人」，點知有網民就歌興大發，接龍一齊唱「一個唔小心.... 唱左出黎添...... 咁繼續唱囉..... #舉不舉也日夜懷念 #很想和你再去推推胸雖然已是不同時空 。」真係見到都有聲啊！
阿聰似乎受到網民感染，突然靈感爆發，隔了幾日再做Gym又影多張相，不過今次就大派福利，連埋一張爆肌相一齊出：「見大家上次咁有創意，亦為咗一班鍾意喺健身房自拍多過舉嘢嘅朋友（包括我）作出些少貢獻，我哋繼續接龍，等大家舉嘢嘅時候，心裏面都會響起一啲歌曲，我先！#想和你去推推胸 #CaliforniaGyming #MyArmWillGoOn #對你推不完，仲有最後一吓嘅時候大聲唱#咇it」
果然今次的自拍相成功進一步刺激粉絲，一日都未夠就吸like近萬，而粉絲的留言又點呢？一齊睇下：
「#Gym樂園 都得喎」
「#一個為你操爆舊腹肌的人」
「#每天推機多一些」
「#獨自去推胸」
「#圍繞師傅已600天 #你有操fit過60秒嗎」
「#情深胸肌未曾推」
「#不操腳罪名」
「#誰明做gym心」
「#原來她不夠愛gym」
「#推來推去」
「#你是我推胸的傳奇」
「#同學愛操gym #推到大細邊 #想不想也日夜來練 #嫌臀部也不夠圓」
仲有改編自阿聰老婆謝安琪《囍帖街》的《舉鐵街》！阿聰睇嚟差唔多儲夠歌出操肌概念大碟喇！不過早排有網民都幫某健身教練創作了一系列的歌名，有幾個名都有點相似，阿聰再努力點寫更多原創歌啊！