C AllStar演唱會搞公投　歌迷自決邊個可以唱solo

C AllStar因比賽而開始，想不到又會因比賽而暫時結束。話說C AllStar今年10月將再次走到紅館開演唱會，暫時仍未公佈演出多少場次，唯一確定的是完騷後四子將會分開發展。自從四子宣佈分開的消息後，四子一起的時間一直倒數，粉絲們當然捨不得四位偶像，四子合唱歌買少見少，按計劃只剩餘5月份推出的《Loveaholic Vol. 2》專輯。由於他們歷來專注音樂發展，作品非常多，難怪他們指今次演唱會節目緊湊，故監製決定只保留一段Solo表演時間，四子將透過全民網上公投，選出最受歡迎的一位，說到尾，其實都係宣傳演唱會啫。

今次四子將會在4月14日各自推出一首獨唱歌，並且在一個月內，各自透過不同渠道宣傳單曲，包括製作mv﹑網上及戶外宣傳等，至5月13日在網上票選Best Solo，決定誰人得到個人表演機會。可是，今次宣傳策略未必個個接受，事關不少樂迷喜愛C AllStar的團隊精神，有網民認真指：「見到在臨暫別的演唱會你們成互相競爭對手，心裡很不舒服。」有網民又話：「買飛就係為咗睇C AllStar呢個組合而唔係佢地四子任何一個個人囉！」甚至坦言：「四兄弟，鬥咩姐？」

不過大家又唔洗咁灰心，事關有網民深信，獎門人到時候應該會出現高叫：「打和啦！」咩意思？可以開足四場，一人一場Solo囉！