梁漢文自爆老土技倆　大腳踢波到鄰校：為咗執波睇女仔

梁漢文（Edmond）近日推出新歌《終身贊助》，歌曲講人情味，而MV亦已出爐，為了紀錄一些令他懷念的地方，在拍攝期間去了多個地方，包括有Edmond的中學母校，當中他尋回了昔日的音樂老師，又重回人生第一個舞台禮堂，Edmond憶述之前有老師榮休，他有回學校演出答謝老師教導，禮堂安裝冷氣時也有義唱籌款。

回憶最多就是球場，熱愛足球的Edmond自爆：「我哋最鐘意喺操場踢波時大腳踢過隔離女校，大家會樂意過去做執波仔，因為過去睇女仔！」要一腳將個波踢過鐵絲網並唔容易，所以Edmond足球叻絕對唔是冇原因！之不過Edmond卻沒有如願和隔離女校的女仔拍拖，反而初戀是同校高一級的師姐：「結果成功約到去食早餐，個朝食完早餐一齊係操場出場，大家都知我鍾意佢，一見到我哋就大聲嗌『Edmond』！瘀到爆！」

Edmond鍾意睇女仔之餘亦是一個品學兼優的學生，當年曾經得過全級英文翻繹比賽冠軍。坐在以前上課的坐位上，Edmond笑言自己坐的是「死亡座位」：「因為我當時身形細粒，所以成日被安排坐第一行，唔可以恰眼瞓，又唔可以傾偈，成日畀miss 睇住！」

而MV的最後一Part就是Edmond的碌人情卡時間，與一齊並肩作戰多年坐圈中好友食飯，有楊千嬅、森美、雷頌德、小儀、王丹儀等。人越大就越難約食飯，所以Edmond就借拍MV為名，約食飯為實同舊朋友聚一聚舊，其中早前被指皺紋多、面皮鬆的森美更自嘲比Edmond老好多，他們又笑言覺得圈內人的新陳代謝比較慢，要好好Keep住，森美又分享一件趣事：「我同以前男校嘅同學出去食飯，搭升降機走嘅時候，我哋就話下次『帶埋啲女出嚟玩啦』，升降機入面其中一個師奶就好不肖咁，其實我哋意思係叫埋我哋個女出嚟玩啊，但佢誤會咗。」