洪卓立入行十年未死得 為氹母親繼續捱：佢覺得阿仔做明星好驕傲
「媽媽覺得有個做明星的兒子，好驕傲，我經常哄他，其實你個仔好紅的，例如內地有些獎項名字好勁，我回去同佢講，係全個頒獎禮得一個！為左哄佢而講這些，當然大家知咩事，但她是我其中一個動力。」
洪卓立入行十年，雖不算成績卓越，但足以令家人自豪。
攝影：梁碧玲
洪卓立2006年透過英皇舉辦的新秀歌唱比賽入行，至今已達第十個年頭。回憶歌手生涯，他仍然覺得難以置信，他憶述：「未入行前我做8個月地產經紀，唔識講野，但都要帶人睇樓，主動聊客Sell嘢，呢件事都係神奇！」
神奇的事要由06年說起，他悄悄地參加歌唱比賽，直闖準決賽，才將事情告訴媽媽，但他坦言媽媽都抱有疑問。「因為我細個唔出聲，我話上電視會見到容祖兒，她於是去睇，我好感動。仲記得在鑽石山比賽，好緊張，唱了一兩句就見到有人舉牌寫上『洪卓立』，這三個字好大力量。」獲得家人支持，當然是最大力量，結果得到個亞軍，幾日後更簽約成為歌手，怎料爸爸亦曾經大潑冷水道：『你估你係郭富城？除衫來看看，你做什麼明星？』結果做新人後，爸爸在旺角街頭看到兒子的廣告，才知道兒子不是「玩玩下」，接受這個事實，轉而支持。
入行初期洪卓立已經廣受樂迷歡迎，但他坦言，自己初期並不適應。「之前做8個月地產，唔係每日都有嘢做，突然做歌手，很忙，很唔Enjoy。」，因此「頭三年都形容自己是喪屍，當時很忙，朝早鎖門走，回家開門時，會覺得好耐冇回過家，一來沒有了朋友，亦沒有靜的時間，食飯都隨意，直至大病，停低果幾年，才開始想想之前很浪費」，洪卓立初時與打工仔一樣，返工望收工，「一隻歌，每一句都要錄咁耐，很想走，有時會頂唔順，在活動上都是隨意唱就算，但大病時人靜左，才開始識諗。」
大病後的改變
人紅當然多朋友，大病令他停工好幾年，雖然未至於一沉百踩，但總感受到人情冷暖。「本來有傾兩句的人﹑公司同事都明顯冷淡，唯一係粉絲沒有走，歌迷會的人會互相替補，反應冇以前咁好，的確灰心，但既然決定重新起步，公司又再畀機會，點解唔繼續？雖然有灰心，中間的確想放棄轉行，但想到自己咩都唔識，已經30歲重新開始可以再做咩？點解踏了半隻腳入呢行又唔繼續？ 」
「本來有傾兩句的人﹑公司同事都明顯冷淡，唯一係粉絲沒有走。」
對數字的執著
踏入三十歲，又是入行第十年，他坦言要來一些改變，「我唔想再做苦情歌，不是第十年去做，數字上比較緊要的一年，所以感謝是很需要。」當時洪卓立第一時間想到要寫感謝別人的歌，於是寫信給著名填詞人黃偉文，告訴自己的經歷和感受，黃偉文得悉後馬上定好歌名《帶著骨灰去旅行》，更在社交網上Po文，指自己好喜歡，但要看看唱片公司能否接受這樣的歌名，怎料英皇接受，成就了今次的作品。
談起新歌，他又謂：「十年裡不論發生什麼，有沒有所謂的成就，我覺得都是需要感謝的。如果沒有這班人，我什麼都不是」，目前計劃的三首作品，除了有《帶著骨灰去旅行》，更有為歌迷而寫的歌。「其實我把口幾唔肉麻的，唔鍾意說出口，我好唔識哄他們，有時覺得他們錯，我會鬧他們，我唔想好假的樣子，出活動和粉絲互動，我近乎冇想過，連比心心我都不鍾意。」
洪卓立最愛的作品...
雖然洪卓立最出名的作品是《彌敦道》，但原來這首歌並不是他的最愛。「其實只是三甲內，我最愛是《很想和你在一起》，可能是拍戲吧？我記得是周博賢監製，那份詞神奇到近乎和套戲的角色一模一樣，感覺會比較大，特別痛。第二位就是《回到最愛的那天》，因為這首歌是自己所想，好希望唔畀自己後悔。」
或許有人認為洪卓立在樂壇無欲無求，但其實他一直努力改變，他坦言：「我夠膽講唔係冇進步。進步未必好大？我OK的，好多事情處理得好了大家都未必看見，我覺得時間上大家未有焦點而已，例如陳柏宇，一早已經是高手，但為什麼上年才見到？因為你焦點不在他身上。」這句說話筆者十分認同，歌手的努力，不應被忽視，既然立立今年有火，加油！
「30歲，其實人好奇怪，有呢啲時候才會有些火，今年有些了！」
Hair：Davy Yu@FIFTH SALON
Makeup：Zoefan @ig zoefan
Wardrobe：izzue@ithk