專訪｜吳浩康與郭思琳結婚非霎時衝動：呢個感覺真係累積返嚟
吳浩康（Deep）與郭思琳在3月中奉子成婚，雙喜臨門。而他的新歌《見字醫病》決定憑歌寄意，在重新學習與太太相處模式時，也希望感情問題不會隨默默忍受而日漸變大。不過Deep在訪問一開始則說，歌曲背後的概念與自己的感情生活是兩回事：「日後都希望樂迷知道，唔係阿Deep結咗婚就唔唱失戀歌，因為我嘅音樂作品唔係畀自己聽，係畀我嘅聽眾。呢個唔係我嘅私人日記，所以都不太相關。」
訪問期間，Deep也談起新婚後的生活，從男、女朋友變成夫婦關係，他直言日後要與思琳持續學習夫妻相處之道：「呢樣嘢係冇得停，我哋大家都未試過結婚，大家都未試過有小朋友，雖然都唔係年輕夫妻，但係我哋都需要一齊經歷呢啲階段。唔可能當自己學識，如果我當咗自己識，或者用識啲嘅心態去諗，我就會去返以前嘅思維。大家同步，要一齊清空，好似一張白紙咁去學。」不過他在訪問中廿，原來兩夫婦現在仍要分房瞓？
撰文：劉傳謙
攝影：梁碧玲
吳浩康髮型：Moe @ IL COLPO (On Lan Street,Central)
吳浩康化妝：木子維納_Vena
吳浩康造型：DEMO OFFICIAL
場地：The AIR (The ONE)
為照顧愛犬分房瞓
雖然關係有變，但Deep認為生活節奏上變動不大，因為結婚前已經開始同居生活，但在註冊前後的相處模式則是天淵之別，此時他自爆：「其實我哋註完冊嗰晚都唔係同房瞓，我哋要分開，我要睇住隻狗，所以我要分開喺另一個地方瞓。」Deep記得註冊翌日睡醒後，二人都覺得互相對望時的感覺已經完全不一樣，認為背後與自己的感情觀有一定關係：「以前拍拖真係可以用『合則來不合則去』嚟相處，當然有啲所謂睇得開嘅人連婚姻都會咁睇，但係我見過父母經歷唔同嘅人生關口，自己各自都會有相處上嘅問題都好，佢哋都會為家庭、婚姻，為咗當初嘅承諾而唔選擇離婚。所以喺我個腦入面，結得婚嘅就係冇退路，冇得『合則來不合則去』，所以使命感會有唔同。」
學懂放下執着互相支持
不過，Deep始終認為自己學懂放下對與錯的執着，才是關係改變帶來的最大得著。他認為過去與伴侶相處的過程中，對話之間出現得太多「應該」、「不應該」，現在學懂顧及對方想法，開始放下自己心中想著的對與錯，夫妻之間不再時刻據理力爭。Deep分享過去同居時已經因據理力爭，不時與思琳產生大大小小的爭執：「舉個例，例如我哋執屋，一講起佢就買一堆嘢返嚟執屋，我就覺得執屋嘅定義本身係想少啲嘢，但係佢就做緊啲本末倒置嘅事，佢話係想買啲嘢執返整齊，我就話『係喇，我過往都係咁諗。』跟住大家就會因為呢啲嘢而鬧交。依家我就會順住佢嘅意思買少啲，或者係順住佢嘅意思，將『買』定『唔買』呢個責任同佢一齊諗，而唔再係我衡量完件事，話我覺得自己聰明啲，方法好啲，佢嘅方法肯定唔好。縱然事實係咁，但係我唔應該基於咁嘅思維溝通。但係我覺得呢個改變係嚟得好自然，確實係冇經歷過一件事而有改變，覺得幾神奇。」
累積信任決定關係升呢
Deep過去的感情生活多姿多采，曾經與視后胡定欣、莊思敏、鍾舒漫、李昭南以及崔碧珈有過一段情，究竟Deep與思琳相處時有否經歷過一件令自己非娶不可的事？Deep先直言：「如果唔係，我點解要娶佢呀？」及後再道出自己的感情觀，認為沒有一刻衝動反而是好事：「呢個感覺真係累積返嚟。如果真係有嗰一刻嘅話可能要小心啲添，如果係基於一刻嘅嘢同一個人一齊，真係要小心。但係我哋關係當中嘅認知、信心係一點一滴喺生活上共同面對一啲事而儲落嚟。我哋儲落嘅唔單止係關係上嘅成熟，而係對呢段關係嘅信心。」至於疫情下舉行註冊儀式，問起Deep會否與期望有落差，他選擇以樂觀心態面對：「今次係教識我冇得幻想咁多，唔需要幻想太多。我真心覺得依家發生緊嘅嘢已經係最好，如果有更好嘅我揀咗啦，而冇得揀嘅選擇本身已經唔係選擇，冇必要去睇，既然我哋活喺呢一刻，咁就活喺呢一刻。我只能夠講係一個好特別嘅婚姻。」
拒將感情生活放入歌曲
說回《見字醫病》，其實歌曲大意早在Deep婚前已經想好，背後藍本從一位前甲一籃球員的感情故事出發，認為假若二人共同面對問題，或許不會遺憾收場。至於談到避免將感情生活放入歌曲，他先從自己站在樂迷身份解釋：「呢個問題當我做樂迷嘅時候都會諗，見到學友結婚，唔同之後只能夠聽到佢唱《你的名字我的姓氏》？原來都唔係，仲可以有《我真的受傷了》。將呢件事放返係我同歌迷之間嘅關係，當然我唔能夠話自己係學友哥啦，但係投放返呢個感覺，我都唔想大家覺得Deep自此之後只係唱幸福嘅歌，唔會唱失戀歌。所以我由呢首歌開始有個好明確嘅方向，畀大家知道我嘅歌係屬於樂迷。當然，我同太太嘅關係之間如果有音樂作品都會攞出嚟，但唔會以我嘅生命藍本同生命階段做一啲歌。」
因《錢七》決定拒用人生階段作靈感
除了從樂迷的角度出發，Deep坦言後續作品不以個人生活為靈感，其實與周國賢的《錢七》有點關係。他曾經在《DEEP 2019+1》演唱會中唱過這首歌，當時覺得《錢七》道出周國賢和「高佬」黃曉暉一同在外國成長的兄弟情，當中的情節也勾起自己與已經離世的哥哥一些共同經歷，沒想到樂迷認定《錢七》是周國賢和「高佬」專屬的歌，更惹來一句「關你咩事？」，令他大感無奈：「我有答到嗰位聽眾，相信身為一個音樂人，任何觀眾用呢首歌作自己嘅情緒投入，佢哋唔會介意。但係我睇到宣傳對於一首歌嘅影響。以前我係會忽略，記者唔係問關於歌嘅嘢，但係我作為唱歌嘅人，我點表達係同首歌嘅宣傳有關，點介紹呢首歌都會影響人哋對呢首歌嘅定位。為咗令樂迷有多啲投入感，我會將自己真實嘅故事同音樂作品拉開啲。」下集專訪，Deep除了談與Cousin Fung首度合作的經過，也大方分享自己近期欣賞的新生代歌手。