E-kids望12月再開騷 Tommy憶亡母：我冇令佢失望
撰文：許栢倫
出版：更新：
《E-Kids 3XL演唱會2017》與Big Bang雖然同日開騷，不過仍然爆滿全場。其中三人各自的Solo部分相當感人，Tim宣布即將做爸爸外，Tommy以雨傘運動做背景，更在台上講出媽媽去世的消息。
Tommy在台上先與小朋友合唱《那一天我們會飛》，背景一直播放雨傘運動的片段，看來Tommy心中亦有取態。唱畢Tommy走到佈滿鮮花的鋼琴自陣自唱《錯愛》，畫面亦顯示出他的媽媽生活照。最尾寫上「呢三十幾年，辛苦您了，無辦法可以再報答您，媽媽我愛您！」
接著Tommy說：「好多謝大家睇我哋重組演唱會，我由98年加入娛樂圈後，組成E-Kids去到2006年，我人生出現咗好大好大個錯誤，呢個錯誤令唔認識我的朋友有個標籤，呢個標籤除咗我之外，最難受係爸爸和媽媽，其實媽媽一路唔贊成我入娛樂圈，送我去紐西蘭，但我做咗呢個決定返來香港。後來我用誠意改變佢想法，03年第一個個唱佢有嚟睇，我冇令佢失望，娛樂圈生涯一手破壞....2016年7月佢有癌離開咗我哋。我好希望佢再一次睇到我唱歌，佢離開時，我覺得佢仲好擔心我呢個衰仔，希望今日開始我要做好我自己！」
演唱會接近尾聲時，Tim坦言：「我哋已經用咗200分，呢個星期，呢幾日瞓咗唔夠十個鐘，今朝我覺得1月21日終於來，mkpop演唱會終於到！ 」說著說著，Tim大叫到聲都拆埋。Alan接著說：「次次我都係大喊包，你話瞓唔夠十個鐘，我可以在屋企訓幾年都冇嘢做，所以我好珍惜今日！」
Encore部分除了唱出《開始戀愛》外，最後亦全唱大合唱《初哥》完結。三子接受訪問時坦言，希望今個年尾12月，能有更大舞台再開多次騷。