【多圖】趙學而個唱緊張走音 爆喊失聲：好唔鍾意自己咁容易喊！
「人生有幾多個十年？」似乎快變成陳腔濫調了，能堅持多個十年，似乎更難能可貴。趙學而（Bondy）入行22年，終於可以一嚐開個唱的滋味。兩場處女騷「我趙學而演唱會」今日在九龍灣Star Hall開鑼，不只主人翁等了廿年，趙學而的好友也替她高興，劉德華、謝霆鋒、王書麒夫婦、周家怡都送上花牌祝福她Good Show；還有學而老公Alan So、《皆大歡喜》舊拍檔阮兆祥和廖碧兒、蒙嘉慧、莊端兒、黃偉文、鄧兆尊、袁嘉敏等到場支持學而。看來這次遲來的個唱，應該令學而非常鼓舞。
唱《難懂》走音 嘲「自濁」遮醜
不過學而唱《難懂》時，唱到臨尾一句似乎走咗音。唱完後，她表示：「自己濁親自己，咁就係『自濁』，因為氣管唔好會影響到唱歌，親身示範咗咩叫『老貓燒鬚』。」其後學而講到開處女show，來自各方好友都打電話給她撲飛，讓她非常感動。至於她講到有朋友問現在才開個唱，會否有點遲？學而臉帶微笑說：「遲到好過無到吖。」全場立即拍晒手掌。
翻唱完《偏偏喜歡你》、《月光燈》、《許願樹》，趙學而笑言今次搞演唱會「呢壇嘢」其實好淆。講到自己以翻唱歌彈起，她即場多謝填詞人黃偉文：「多謝佢首《最佳位置》，啲人先知我翻唱係有陣除，不過唱呢首之前，其實都有翻唱過其他歌，大家好似唔係好知，但唔緊要！」其後她再唱另一經典翻唱歌《我說過要你快樂》。
而唱到《你是你本身的傳奇》時，趙學而終於忍不住眼淚，「多謝方皓玟寫呢首歌，多謝我人生嘅經歷，令我每次唱呢首歌都喊，唔知點解每一次每一次都喊。」之後更講到眼淚收唔到，「大家以為我好似好惡，但我其真好眼淺，係一個喊包！好唔鍾意自己咁容易喊！」之後她關心自己個妝喊溶咗，問台下觀眾有無黑眼淚，阮兆祥係台下大叫：「無溶！」
「發覺自己啲歌嗌到好高音，唔知你地（歌迷）唱卡啦OK會唔會好辛苦？我都覺得好攞命！」
趙學而表示她有最不喜歡的歌，但經過演唱會後，可能會改變想法，「我有20年無唱過呢首歌，除咗做主打歌嗰一期，真係好耐無唱，我要將呢首歌送畀葉志銘先生。」其後學而唱出人生第一首主打歌《反叛情歌》。
歌迷力撐重唱3次
學而今次可能開處女騷，表現有點緊張，失了少少水準。重唱3次《輸給戀愛的女人》之後，一班歌迷熱烈地拍掌，表示學而終於得咗喇！學而見到自己又重唱、有小失準，觀眾都仍然咁支持自己：「你哋真係好慷慨！」之後忍唔住哽咽，續道：「你哋唔好咁早整喊我喎！」成為第一個哽咽位。