鄭中基自認出道不解潛規則：去某台客串就有更大機會入圍頒獎禮

香港電台第二台推出全新音樂節目《音樂說》，邀請不同歌手以音樂細訴自己的故事。主持王耀祖在第一集就請來鄭中基，以不同歌曲概括回憶入行以來的高低起跌，並剖白鮮為人知的內心世界。

憶台灣辛酸生活　初出道已想退居幕後

不諳國語的鄭中基，憶起在台灣出道前的一年過得十分辛酸：「出碟前一年我隻身到台灣，逼自己每日一個人都要出街講國語，又喺公司讀報紙，同事行過就糾正我讀音。」鄭中基以《左右為難》形容初入行時期的自己，只因當時為宣傳新碟，被安排到不少綜藝節目亮相，而在1997年推出國語專輯《絕口不提!愛你》時，他驚覺與歌手的身份愈走愈遠，更一度想過退居幕後：「嗰時已經覺得自己唔係唱好多show，冇咁多現場表演畀觀眾直接睇到。喺街度會有人同我講『我睇過你做嗰個節目，好叻呀你！』我諗即係你其實唔係聽我哋歌，你只係鐘意睇我做其他嘢。」

不過，鄭中基在專輯宣傳起後開始到訪不同校園，他坦言當時透過與學生互動，重拾成為歌手的興趣：「嗰時去到唔同嘅大學、中學唱歌，又會同佢哋夾Band，有時會彈下佢哋啲歌，嗰陣覺得好開心。我喺籌備第二隻碟嘅時候問『我可唔可以做咗呢啲先？』去到校園，佢哋鍾意就鍾意，唔鍾意就會冇乜反應，所以聽到佢哋有反應就會好開心。」

後來鄭中基帶著人氣進駐廣東樂壇，音樂路發展可謂急步上揚，但他直言對當時香港娛樂圈內的「潛規則」大惑不解，感到十分迷茫：「我冇諗咁多圈內嘅『政治嘢』,以前好唔明白,去某台客串劇集、做個節目，就會有更大機會入圍樂壇頒獎禮。我唔識呢啲遊戲規則，只係諗如果我好叻呢啲手段，係咪即使唔使唱得叻都得？」時至今日，鄭中基坦言，希望後輩能專注事業上的發展：「依家同啲新人合作，我會將嗰啲問題留返畀我，佢哋去搞創作，去諗佢哋覺得啱嘅嘢。」

育兒心得受父親影響

鄭中基在節目中重談低潮期，稱當時的唱片公司亦放棄了自己，而他在美國自我進修時，是劉偉強向他伸出援手：「喂，你都冇嘢撈㗎啦！返嚟拍戲，我畀兩個角色你揀。」那正是2001年由黎明主演的電影《不死情謎》。鄭中基在即將播出的ViuTV劇集《暖男爸爸》中，飾演患憂鬱症的單親暖男爸爸，他在現實中與子女關係十分親密：「佢哋唱歌嗰時，我又會加入唱埋一份。我吹緊色士風，阿仔又會拎支牧童苗突然加入。」他的育兒心得是盡量不干擾小孩的選擇，希望他們獨立思考，現在回想這原來深受其父親影響。

爸爸鄭東漢是知名唱片公司高層，他曾寄語尚未出道的鄭中基：「呢個世界得一個張學友，唔會有第二個，亦都唔會有第二個許冠傑、鄧麗君。你要自己諗，可能之後唔會咁成功，或者可能會成功啲，但係千祈唔好話做第二個張學友，冇可能。依家就話咗畀你聽，咁你自己諗下做唔做。我唔會主動話你知要做乜，但你有問題可以隨時嚟問我。」要以一首歌總括兩父子關係，鄭中基毫不猶豫地選擇《許願樹》：「呢首係我爸爸第一首幫我彈嘅歌，當時我第一次喺紅館開演唱會，佢主動提出要幫我彈一首由我作曲嘅歌畀我唱。我爸爸唔係好識講鼓勵嘅說話，呢次係佢咁耐以嚟最明顯嘅一次表達。」

至於今年的音樂發展，鄭中基透露目前正籌備新專輯，將過往耳熟能詳的作品重新演繹：「例如之前有啲新曲加精選專輯，我唱完幾首新歌，搭埋落去以前啲歌，我自己都冇辦法由頭聽到落尾。（風格問題？）係，啲聲唔同咗，唱嘅感覺又唔同，我想其他人聽返啲舊歌，你可以有多一個選擇，就等於依家你喺演唱會度聽我唱，一定係有唔同。」