陳奕迅大學講座認真談K-pop　自認欣賞女團美腿：好奇未必係鍾意

陳奕迅（Eason）現身香港大學舉行「大學問」講座，答問環節更有Facebook Live現場直播，Eason一副愛因斯坦Look現身，有幸見到Eason真身的人，在短短一小時內當然爭相搶住問Eason問題，其中有人問到如果「陳奕迅」三個字是形容詞，會代表什麼？Eason笑言應該是代表「瘋癲」和「跳脫」，又話瘋癲都可以好正面。

其後，又有現場學生問到Eason怎樣看現在的流行曲、K-pop不太着重歌詞？Eason非常中立的講到這是大家的選擇和層次的問題，但個人比較少聽韓國、日本音樂。認真過後，他突然非常跳脫話：「我嗰日經過一個好大嘅電視銀幕，我就停咗喺到，有一班女仔，啲腳係差唔多咁嘅樣，我係一個『腳人』嚟，我欣賞腳，係男仔都會嘅，見到八雙腳喺到，係一定會停㗎，好多女會覺得男鐘意大胸，係會好奇㗎嘛，係好好奇㗎咋，如果你見到男仔褲浪有樣嘢，你會唔會好奇吖？好似你見到大笨象咁細隻嘅，都會好奇㗎嘛，好奇未必一定係鐘意，真㗎！」

Eason落力地用實例証明視覺會影響聽歌的意慾，又話覺得欣賞視覺衝擊和音樂是兩個層次，更說到：「講返個公道說話，佢哋個樣係唔同㗎，咁高清係到睇，係唔同嘅。當然你嘅喜好係留意歌詞，但我行過商場，同老婆一齊都會…好高清你睇到，點都會吸引㗎嘛。」

另外，談到Eason覺得多年來意義最重大的歌，他直言是《歌頌》：「我唔記得有冇派台，不過嗰時拍咗MV，好多合作過嘅音樂人嚟咗，依個係我嘅光榮，唔知一世人有幾多次機會，佢哋嚟到可能就係為咗同我影一個Shot，聽到首歌都…」說到這裡，Eason不禁眼濕濕，更單手掩面，笑言可能年紀大了特別感觸，及後又清唱了幾句副歌。

而講座的最後，Eason更拿出木結他自彈自唱《我的快樂時代》，雖然有啲部分不太記得，但觀眾都相當滿意，Eason又寄語年輕人：「好多時候，安排好緊要，120分未必係最滿意，冇安排、彈錯，有時做人嘅嘢係咁㗎，唔使計較太多，Enjoy個moment，錯處都要enjoy，生命唔係得好，有錯先完美，好開心同大家一齊經歷依段時間，畀我好大滿足，希望將來有機會喺hall認認真真唱畀你哋聽。」