【專訪】慘情歌市場永遠不死　鄭俊弘：唔開心嘅人鍾意聽歌詞

提起歌手鄭俊弘，大家好快會想起他過去一年的是是非非，還記得他初初在TVB捱了多年，到比賽節目《星夢傳奇》令他獲得第二人生，成為歌手，當初因為苦盡甘來而上娛樂頭條，到早前的卻因為負面新聞而被人口誅筆伐，面對這個低潮雖然他避而不談，但他卻把一路以來的心路歷程放在歌曲《起跑線》中，不論是歌曲的MV或是填詞人張美賢的歌詞，每個細節都來自他心中一字一句：「當時創作《起跑線》嘅我當時的確好唔開心，我覺得有一種情緒係要發洩出嚟，所以我將所有當時嘅想法都放喺呢首歌入面，寫完出嚟有一陣鬆一口氣嘅感覺。我明白創作呢類題材係非常敏感，所以我當初有考慮應否赤裸裸去表達自己嘅想法，依家就算有人問我之前嘅是是非非我都唔會再提，因為我嘅想法，當時嘅心景都已經寫喺呢首歌入面，我再講只會越描越黑。」

Fred不諱言要推出這首歌需要莫大勇氣，因為當中題材敏感，而且有不少細節也有一種「正面抽撃」之意，不過令他開心的是他從頭到尾都得到他的伯樂支持：「老闆好贊成我推出呢首歌，佢俾我好大嘅鼓勵及支持，佢都認為呢首歌有助我宣洩情緒，令我更加堅強。」

Fred過去曾唱過不少慘情歌如《熊貓》、《投降吧》等，並得到不俗的市場反應，今次《星光》卻一轉口味，改唱甜蜜浪漫作品如《一個人的永恆》，「《一個人的永恆》聽落好似好慘，其實係一首幾浪漫嘅歌，而且喺我咁多首歌入面最甜蜜嘅一首作品，相比之前嘅大碟以慘情歌為主，如果我再唱《熊貓》、《投降吧》呢類歌我會變成有創傷後遺症嘅病人一樣。」Fred笑言。

他續說：「無論唱情歌或慘情我都好，其實各有長短處，往往慘情歌較受歡迎，我覺得呢樣應該同大家聽歌習慣有關，通常開心嘅時候只會聽到旋律，唔開心嘅時候反而會聽到歌詞，會比較留意字眼上嘅細節，所以普遍慘情歌較易有共鳴。」

Fred對大碟製作過程感到有所得著，由其是早前緬甸探訪之行：「我覺得《雲彩》為整張專輯加入唔少靈魂，因為呢首歌係我之前去緬甸探訪一班孤兒而有感而發，今次之行令我體會好多，令我更加學懂珍惜眼前嘅所有。」