【專訪．有片】小塵埃走出迷茫　翻唱經典兒歌《哪兒》有新體會

出道5年，由Jonathan與Pollie組合的小塵埃向來成績不俗，首張專輯《Be Little》反應很理想，但卻在兩年後才再交出《A Little Louder》，然後又在再一年多後才出現了《Recall A Little Bit》，翻唱了不少經典兒歌，十月底將會舉行首個售票音樂會，唱片公司似乎也認為是時候了。

距離開騷不到一個月時間，小塵埃說興奮多於緊要，完成了揀歌的部分，目前主要討論視線效果，問到過程中可曾出現意見不一，Pollie雖說「都無嘅」，但Jonathan轉頭就話:「如果真係意見不一，都係曲目排序方面，都有同公司傾，因為真係第一次有個120分鐘的演出。」對於這個「第一次」，Pollie說是來得剛剛好，假如是去年進行，無論在心態或曲目上都未有足夠的準備，Jonathan補充說。「因為係唱自己歌，所以已經有一定信心，平時演出無band support未必玩到好多歌，但今次full band可以玩晒。」小塵埃向來予人小清新、正面的感覺，但他們坦言曾經歷過迷茫、自我否定的階段。「有時覺得自己進步得唔夠快，那陣子都幾唔自我認同，會好介意別人對於我們的標籤同comment，好似一定要做到大家想像中咁fresh，係有少少失落，所以出現了《卜卜卜》，幸好的是我哋互相陪伴了大家，一齊去經歷，現在是another journey」組合嘛，就係要一齊起起趺趺。
 

小塵埃最近翻唱經典兒歌推出EP《Recall A Little Bit》，當中的《哪兒》、《仙樂處處飄》、《生命有價》相信是不少80後的童年回憶，這天訪問時，《哪兒》的作曲人梁志成、原唱葉蘊儀也在場，聽到小塵埃版本的二人也表示有著煥然一新的感覺，最近有網民發現《哪兒》的一歌詞暗藏玄機，「書本中有農場 抬頭只得操場」又或者「天空不見月亮月亮躲於高牆」似乎更為適合成年人聽，葉蘊儀說當年收到歌詞後，也並不覺得是首兒歌。「覺得歌詞好有意思，有訊息帶到比聽眾，其實就好似小朋友同大家睇兒童故事書一樣，都會get到唔同的訊息。」作曲人梁志成表示當年是為了參加兒歌比賽才創作出《哪兒》，由於他與填詞人林瑞峰都是住在旺角，所以才會有「天空不見月亮月亮躲於高牆」。「唔係話依家社會變遷，而係城市化咗，嗰陣聽《哪兒》係較無憂無慮，但小塵埃彷似將黑暗面掘了出來。」小塵埃坦言跟不少喜歡音樂的人一樣，小時候都由兒歌陪伴成長，長大後就會發覺這些歌曲的種子早已埋下並發芽，所以未來也想為下一代製作更多陪伴他們成長的兒歌。