入行以來最愛《Creo en Mi》MV　鄭秀文：有我想要嘅電影感！

鄭秀文（Sammi）今日在銅鑼灣舉行新歌《Creo en Mi》的MV首播會，吸引大批粉絲到場支持。除了同現場一班歌迷一齊見證首播之外，今次的MV還會在銅鑼灣某百貨公司外的大熒幕上同步播放，Sammi也表現得相當興奮：「我好期待今日，因為平時睇最多咪大電視，但就未試過呢啲大嘅熒幕囉。同埋覺得呢兩隻歌嘅畫面都好適合喺咁大嘅熒幕播放，因為個震撼力同感染力好強。」

新歌《Creo en Mi》是一隻來自西班牙的歌曲，意為相信自己，Sammi透露她聽了幾百次之後，決心要揀這首歌，當中的Rap的部分就搵來Jackson王嘉爾：「初初都係試下啦，第一佢好忙，第二因為佢主力都係唱英文歌，我唔知佢會唔會再有興趣唱下廣東話嘅歌，點知佢聽咗隻demo之後就鍾意呢隻歌，好快回覆話：『可以可以，合唱』咁仲要有心extra再為呢隻歌創造咗啲melody喺裡邊，再有誠意啲，佢再同佢嘅團隊再做多一個remix版，咁我諗佢真係好鍾意呢隻歌，所以我feel到佢好投入。」雖然兩人素未謀面，不過配合得相當默契，Jackson還送上短片祝賀Sammi，令她非常感動。

今次的MV由Sammi和70位演員合力演出，場面震撼，她看完之後也很感觸，搞到眼濕濕添，還笑言「拍電影都冇咁多人」。其實今次的拍攝過程相當辛苦，Sammi在人群中被推來推去之餘，更跪低被人「淋紅油」，搞到啲「油」入晒口耳眼鼻，不過她卻不以為然：「辛苦都係其次啦，我能夠一步步實踐自己心裡邊嘅idea，同埋個團隊好幫到手，可以話不惜工本，我自己好開心囉，人力啦、物力啦，又有好多金錢嘅投資啦，因為自己好耐都未試過做一隻廣東歌可以有咁多人力、物力嘅資源，擺喺一個廣東歌嘅MV裡面。」

Sammi坦言完成呢隻MV就好似帶著一個使命感做咗一啲嘢：「諗返成件事點樣去由一開始一個idea，咁又邀請咗Jackson，攞到呢隻歌個Right，跟住開無數次嘅會，處理咗好多唔同嘅問題，最終完成到，我好開心。」投入那麼多心血，難怪Sammi也稱這是自己入行以來最鍾意的MV：「因為我覺得真係做到我好想有嘅電影感，第二佢有一定嘅故事性喺度，唔複雜但係有個完整性，同埋個故事都好合情合理，我同導演講我唔想一開始成個MV就好似好光明，我想有一啲人性嘅黑暗喺入邊，咁所以佢就搵咗幾十個群眾演員，一齊去營造一種慌亂、混亂、迷失嘅感覺囉，咁慢慢喺個黑暗裡面，因為相信自己呢個信念，再搵返自己，我覺得成個意念好好，所以我好鍾意。」