【唔編唔聽】《深化危機》冇你諗咁易 Howie：簡單又唔悶係最難
《唔編唔聽》來到Dear Jane篇，今次將會解構《深化危機》的編曲是如何運作。一首聽起來充滿電子元素、感覺像EDM的歌曲，其實依然以Band instrument為主軸，但在這之上加入Synthesizers （電子合成器），及做了Sampling（取樣），令《深化危機》帶有Urban、EDM的感覺。
打頭陣有Howie講解《深化危機》結他部份！
攝影：梁碧玲
每次Dear Jane風格轉變都會引起迴響，由Pop Punk到情歌，再到近期《深化危機》、《寧願當初不相見》的電子風格，樂迷都有不同意見；但無論怎變，他們仍然是Dear Jane。
即刻拉落去睇下Howie點講啦！
Howie捨難取易：唔係我懶，簡單仲難！
Howie作為Dear Jane的結他手，而且身兼監製一職，對創作以及編曲當然有自己一套見解。而《深化危機》只用了3個和弦組成，雖然看似簡單，但Howie卻以此自豪：「我好Proud of一樣嘢，我成日都好想將每一首歌，越簡單作越好。越簡單嘅嘢過到骨，我就會揀簡單嘅方法，呢樣嘢唔係我懶，其實簡單係好難！」
他續說：「我哋以前有首歌叫《咖啡因眼淚》成首歌係得3個Chord（和弦），但係呢3個Chord嘅次序會掉亂。一首4分幾鐘嘅歌，得3個Chord，不停用編曲同埋聲音上處理，令到你唔覺得悶係好難！」
《深化危機》由以下3個和弦組成：G#、A#、Cm
何謂五聲音階？ 幾粒音彈出洗腦旋律
Howie指作曲時簡單，在編曲上使之豐富是非常困難。《深化危機》有一句鮮明的樂句貫穿全曲，聽得一次便會記得非常洗腦。Howie透露，這句樂句只是用上Pentatonic Scale（五聲音階）當中幾個音符組成。
《深化危機》是C小調（C Minor Key），故用上C Minor Pentatonic Scale。而Intro與Main Riff（主要樂句）的音符一樣，只是彈法不同；而且Main Riff加上Rake的技巧，做出「咔咔聲」，配合歌曲節奏做出比擬hi-hat的效果，使樂句律動感更強。
註：《深化危機》是C小調（C Minor Key），故用上C Minor Pentatonic Scale。
樂迷想Cover得精準 要記住呢一點
正如上一段所說，《深化危機》Intro與Main Riff的樂句都是出自C小調五聲音階，而且組成音亦一樣；但Howie指出要Cover得精準（這裏的Cover意謂讓樂迷之後翻彈），在音色上要花點功夫。他解釋：「喺唱片入面，個Intro你會聽到有一種『mute mute哋』嘅聲，其實個聲係錄音嗰陣，用EQ（Equalizer，即等化器）做出嚟，係一個Low Pass嘅Sweep（頻譜）。」
不過如果只得一把結他去彈，Howie建議大家可以右手控制Tone Knob（調節高頻），左手（按弦的手）做Tapping/Hammer On的點弦動作，達至接近CD版本的音色。
Telecaster打入冷宮5年 突「破塵而出」變錄音主角
Howie手上拿着一把Fender American Vintage '52 Telecaster（下稱Tele）電結他，正是錄製《深化危機》時所用到的，原來背後都有段故。
這把Telecaster於2013年用作錄製《不許你注定一人》的結他solo後，就被擱在一旁「食塵」，長達5年，因為他本身已有另一支「錄音神器」，直至今年才「重見天日」錄製《深化危機》及《寧願當初不相見》，如此轉變，就連Howie也直呼「神奇」。
這把Tele經過Howie改裝，將Bridge Pick up（琴橋拾音器）由原來的Single Coil（單線圈）改成Humbucker（雙線圈）。Howie表示：「好多人玩Tele都會將Neck Pick up改成Humbucker，但係我就掉轉，因為我想保留嗰種『冇咁電結他』嘅音色。」