【專訪】林峯攞亞太區不代表樂壇死亡　鄧智偉：係TVB嘅問題！

曾一手捧起林峯、鍾嘉欣等電視藝員轉型歌手的鄧智偉，2013年正式宣布離開TVB，自此淡出香港市場。不少人好奇，到底鄧智偉到了哪裡？直至五年後的今日，他終於帶著多年的成果重新出現在大家眼前。花了五年光陰，他終於找到他心目中的中國版「Justin Bieber」 - 李聰。但原來對於「前娘家」TVB，在鄧智偉如今看來已是另一番模樣，多年前更因為一個心結而離開。如今踏上全新的音樂路，他坦言：「唔會帶新人返去唱歌！」
攝影：江智騫

參見文章： 【專訪】力推新人李聰 鄧智偉轉型玩Urban回歸樂壇

過去五年時間，鄧智偉與莊冬昕打造新廠牌，到世界各地尋找音樂新路向。結果，今年終於收成，推出首個自家藝人李聰。但講到當年離開TVB的經過，原來鄧智偉的決定，全因一句說話。他直言：「我做咗十幾年音樂，去到一個時間點，我唔想再重覆自己行過嘅路。當時我都覺得自己仲能夠影響到一個電視台，或者香港嘅聽眾，直至一個飯局嘅出現。」

當年仍任職TVB「正視音樂」高層的他，不時有機會接觸到外國娛樂公司的CEO，其中一次的二人飯局，卻影響他往後的日子，那位CEO跟鄧智偉說：「你在香港做了一段時間，也算是有影響力。我想問問你，韓國有Bigbang、美國有Justin Bieber。香港有什麼人？」

就在那一刻，鄧智偉整個停頓了，因為他完全想不出答案：「我唔可以答佢係陳奕迅，又或者係張學友，因為呢啲係神級嘅歌手。但我哋對話講緊嘅，係21歲嘅年輕人，針對年青市場嘅音樂人。嗰一刻我真係諗唔到。」那位CEO再問：「OK，香港可能太小了，那中國呢？中國有什麼代表歌手？」鄧智偉再度陷入迷思：「我更加答唔到佢，當時我就把心一橫。點解全個中國有咁多人口，咁多talent。如果我有能力，點解我唔嘗試去為自己生活嘅地方，去做一啲嘢，等人哋以後都唔可以咁大聲，擺到自己咁高位去同我哋講嘢？而家永遠都係我哋邀請外地嘅藝人嚟表演，點解唔可以係外國邀請我哋嘅藝人去表演？」這便成為了鄧智偉離開TVB的初衷。

過去一段日子，鄧智偉經常被批評，更有樂壇前輩表示：「當林峯憑《Chok》行上台攞亞太區男歌手嗰一刻，香港樂壇已經正式玩完。」想不到原來鄧智偉對這個講法一點也不介意：「因為呢個並唔係事實。針對嗰個獎項去講，點為之最受歡迎，就係得一、二、三、四，四個選擇入面，的而且確，林峯最受歡迎，呢個係基於賽制同比賽名單去陳述嘅客觀事實。我諗嗰位前輩講呢一番說話之前，佢無去睇一個客觀環境因素。我亦相信，我做嘅音樂、林峯當年嘅音樂都係好有影響力，喺嗰個Generation入面，好多人到今日都識得唱。我相信，甚至嗰位前輩都識得唱，同一時間，嗰一位前輩嘅歌，我都識得唱。大家係一個知己知彼嘅態度。我再次重申，可能好多人不滿林峯攞TVB個亞太區獎項，但呢個係TVB高層同機制嘅問題，而唔係我哋做音樂嘅問題。」

再次提及娘家，鄧智偉顯得有點激動：「我哋做音樂盡心盡力，從頭到尾都係為咗去影響年青人，希望帶一啲好嘅音樂比佢哋。相反，而家TVB嘅音樂，係垃圾！」但無可否認，TVB在香港至今仍是其中一個最具影響力的媒體，而鄧智偉同時要將自家新人李聰帶到包括香港在內的不同地域，某程度上，TVB也能發揮一定作用。站在音樂製作人以及經理人的狹縫間，到底鄧智偉又會否將李聰介紹到TVB，讓他上節目、唱劇集主題曲？鄧智偉堅定回答：「可能性係零。我相信仲有其他有影響力嘅方法，我仍然相信自己嘅路。」

再次細聽現時鄧智偉與莊冬昕成立「Unleash」後的音樂，的確比TVB時期走得更前更有質素，再不是老套的「劇集歌」