【專訪】黎瑞恩自爆係男仔頭女神 唔鐘意畀人叫玉女
TVB《流行經典50年》的成功，令一眾8、90年代的歌手重新亮相於幕前，樂迷回味過去廣東樂壇的美好，無獨有偶，幾位在90年代紅透半邊天的寶麗金小花，也紛紛在這半年時間內陸續開騷。除了周慧敏、湯寶如早前完成她們的個人演唱會，還有黎瑞恩也即將於紅館舉行演唱會。不知不覺，原來自小恩子退出樂壇，距離上一次的紅館演唱會已有16個年頭。
攝影：陳順禎
Make up：Meegan Seak
Hair：Sev / John @ Hair Culture
提起今次的紅館演唱會，其實很合乎小恩子的性格，沒有所謂擇良辰吉日、為鴻圖大計舖排，她形容整件事也是相當自然地發生：「早兩年出咗一張Hi-Fi碟，當時公司已經有問過我。」公司的一句「你想唔想開紅館？」加上小恩子一句「哦，你攞到期咪開囉。」結果，便造就了這個4月的紅館檔期。
既然要開騷，自然也要出碟出新歌做宣傳。小恩子表明即將推出兩張新唱片，一張是Hi-Fi碟，另一張則是新歌專輯。可能你會覺得奇怪，為何一口氣要推出這麼多唱片，會否倉促了一點？其實也源自於小恩子的一點小執著：「因為你唔可以將Hi-Fi碟嘅歌同新歌擺一齊，明明聽緊Hi-Fi歌，突然又轉咗隻Bollywood出嚟，好怪㗎嘛。所以最後決定出兩張唱片，中西樂嘅元素都有。」推出唱片前，其實她也有一點隱憂：「因為上一張Hi-Fi碟做得太好，今次怎樣才可以突破？後來監製有一個很聰明的點子，便是做出一張Non-Stop的Hi-Fi唱片。由第一首歌聽到最尾一首，中間也沒有停頓，但八首歌曲的頭尾也是連貫的，你聽完整張唱片也不會有違和感。」大概我們也會想像，這類Hi-Fi唱片的選曲也會偏舊，不過小恩子喜愛新事物，除了翻唱張學友、劉德華、杜麗莎等前輩歌手的歌曲外，想不到連林一峰、張彥博的歌曲也收錄其中。
大概是受女兒影響，小恩子也不時留意韓星的資訊，尤其是少女時代。不過她笑言：「可惜改編唔到佢哋嘅歌翻唱，因為用廣東話去唱韓文歌真係會好肉酸。」翻查一下資料，其實小恩子多年前已有改編韓國的作品，她仍深刻記得《雲上的日子》是其中一首，但大概連她自己也想不起，其實1992年的大碟《雨季不再來》當中，《廿世紀不了情》同樣是改編自韓文歌，原曲是申勝勳的《秋天的回憶》。講得興起，問她會否在演唱會中特意邀請女兒上台合唱韓文歌，她則表示：「其實真係有諗過度過，本來諗住同佢，仲有另外幾位同學仔合作跳吓韓文歌。不過佢呢段時間都喺外國讀書，無時間返嚟香港練習，要一直到我開騷先返到嚟。」但原來女兒並不常聽她的歌曲，她笑言：「佢最多都係聽《一人有一個夢想》，因為我唔會將自己啲CD放係車度逼佢哋聽。可能佢自己會喺我不知情嘅情況下上Youtube搵嚟聽嘅，不過佢哋呢個世代都係比較熱衷於韓文同英文歌，搞到我都鐘意韓文歌，阿女聽咩佢都會推介畀我。」
現時被感染愛上快歌的小恩子，在寶麗金年代其實並沒多少快歌。她笑言：「我係玉女嚟㗎嘛，玉女唔應該跳舞，因為太多『肉』了。」當年仍是一個懵懂的小女孩，在她心目中，監製便是工作指標：「以前監製揀歌，我哋無得Say，佢揀咩，我就唱咩。其實每個Artist都會經歷過一個階段是希望做自己喜歡的作品，可能不是大家會喜歡的。例如當時還是二十幾歲的我，經常渴望唱一些較成熟的作品，21歲的我已經覺得自己長大了，所以好嬲監製經常逼我唱少女作品。但其實當時我根本未有足夠歷練去處理成熟的歌詞，現在想起來還挺好笑的。」講起成熟，黎瑞恩形容自己以前工作渾渾噩噩，沒甚責任感，她大爆：「以前唔知自己想點，有歌咪唱囉，我又唔鐘意同人爭嘢。鐘意唱歌，但又唔鐘意做訪問同影相，我試過衰到約好晒訪問，當日講一句唔舒服就推晒所有工作，唔想做就唔去做，其實都幾自我。一直去到結咗婚生咗小朋友，責任感就開始好重。」
再聊下去，才發現原來小恩子對自己的玉女身份帶點抗拒。她坦言：「叫我陽光女孩都無乜問題，但千祈唔好叫我玉女。因為我本身個人比較男性化，但礙於大家都覺得我嘅外表比較女性化，所以都要我保持玉女形象。打個比喻，如果你女神突然好豪氣咁同你講『喂！食唔食嘢呀？』你都會驚啦。」其實放諸在當代，似乎大家又會覺得這種不做作不嬌情的女神也挺吸引。而小恩子也立馬將這一面呈現出來：「其實各位歌迷今次只要入場就有機會睇到我呢一面，因為大家成日問我演唱會有咩睇，但又唔入場，咁我點呈現呢？」在場眾人聽到這突如其來的轉變，無不捧腹大笑。或許這位Man Man哋的陽光女孩遲一個十年才出道，便能將最真實一面表露無遺。