古巨基闊別7年再開紅館騷 黃子華拍片撐：聽講你有隻歌同我有關
撰文：黃浩晉
出版：更新：
古巨基的歌曲可謂代表住大家的集體回憶，基仔已有7年未在香港開個唱，今日在facebook向樂迷送上好消息，他寫道：「5月，紅館見！」簡單有力的一句引來近2千個Like。
不過，基仔5月開紅館騷這個消息並非由他親口講出，而是請到「子華神」黃子華代勞。子華神拍片說：「古巨基聽講你5月開演唱會喎，依家已經係2月喇喎！7年冇開演唱會，忽然之間話要開演唱會！聽講你有隻歌係同我有關㗎喎，你唔好呃我喎，我一定係擘大隻耳等候你演唱會！」
子華神開金口，睇相同字邊會夠，當然要聽聲啦！
古巨基唱過多首大熱歌曲，其中《勁歌金曲》更是大家K房必點歌，皆因此曲長達10分鐘，臨近「被cut鐘」靠晒佢去拖時間；加上《勁歌金曲》集合80、90及千禧年代的大熱K歌，的確承載住大家的回憶。除此之外，《第二最愛》、《愛與誠》、《歡樂今宵》、《愛得太遲》、《傷追人》、《必殺技》等等都是80、90後耳熟能詳的K歌，隨便都能唱出一段chorus。
基仔近年都專注在內地發展，2015年《我是歌手》表現令他爆紅，相信不少樂迷都期待基仔快點回歸香港開騷，今次終於得償所願。如果想「止咳」，可以重溫基仔上月現身《流行經典50年》的演出，他一口氣唱出《歡樂今宵》、《戀無可戀》、《傷追人》、《愛與誠》等等金曲，Loop到5月就可以見真人喇！
古巨基回覆傳媒表示，因為黃子華靚仔所以請他代為公布自己開演唱會，「因為佢靚仔吖嘛！我咁緊要嘅一件事當然要搵個靚仔幫我講。同埋佢當旺呀，因為佢電影咁爆，票房咁好！」對於網民關注與子華合作一事，基仔話：「係嘅！我同子華係有合作，將要喺3月份先可以公布！」闊別紅館7年，基仔表示有7年之癢，「好痕呀！7年之癢呀！好期待！今次香港特別版最大唔同，係呢場會全部都唱廣東話，特別為香港訂製！」