古巨基銅鑼灣Busking唱兒歌medley　卡通版《勁歌金曲》面世啦！

今年香港樂壇好可能係「古巨基年」，因為啱啱年頭基仔已經不停發力，又出新歌又上電視節目，曝光率極高。今日基仔又有新搞作，事關佢親身落到銅鑼灣Busking，一口氣唱咗成半個鐘，並且喺Facebook全程直播。

其實早幾日基仔已經喺社交平台上預告過自己會落銅鑼灣Busking，雖然無特別提及會唱咩歌，不過樂迷大致都估計到《友共情》同新歌《初心》呢啲係走唔甩。不過好戲果然在後頭，Busking最後一Part，基仔一唱出「天空宇宙任我闖　追蹤那耀眼星光　只因我是至Net小人類」，全場氣氛立刻熱烈起來(聽到呢首歌有反應嘅，大概都估到咩年齡)。不過唔單止《至Net小人類》，差不多10分鐘的兒歌medley中，基仔還唱出了《黃金戰士》、《忍者小靈精》、《美少女戰士》、《龍珠》、《足球小將》、《熱鬥小馬》、《機靈小和尚》、《IQ博士》、《叮噹》、《長腿叔叔》、《我係小忌廉》、《藍精靈》、《櫻桃小丸子》等卡通的主題曲，橫跨好幾個年代，彷似是卡通版的《勁歌金曲》。比較可惜的是，基仔反而沒有在medley當中加入自己主唱的《我愛毛查查》，令樂迷略感失望。

說起來，古巨基可算是樂壇中最具童心的歌手，除了有不少兒歌代表作外，他亦相當迷戀日本動漫及遊戲。還記得2003年基仔重返樂壇，一口氣做了兩張大碟，分別為《遊戲基》及《大雄》，當中每首歌也是以「遊戲」及「漫畫」的名字和角色為題，引起樂迷共鳴。

最近，他亦為新歌《初心》拍攝宣傳片，與新歌MV中的小朋友交換身份一日，基仔代替小朋友上課外活動、興趣班；而小朋友則去代基仔錄音，和 Mani 開會等等。過程中，看見基仔超投入在兒童的各項活動中，實在是相當爆笑。你話「最具童心歌手」唔係佢仲可以係邊個？