【專訪．有片】Rap咩語言都有批評　MC Jin：14歲就俾人叫收皮

由美國rap贏黑人成為《106 & Park》七屆台主，到香港個個都認得佢係「ABC」、「立青哥」，再到現在以Hip Hop Man身份在內地人氣急升，MC Jin一路走來的高低起跌比電影更精彩。MC Jin試過放棄Hip Hop差點由rapper變成收銀員，幸而他視挫折與批評為動力繼續走下去，大家才會見到今日的Hip Hop Man。
陳順禎攝

上一集MC Jin與大家分享過06、07年在美國浮浮沉沉，捉襟見肘得差點放棄音樂。不過，成功背後要面對的批評又豈止如此，無論用甚麼語言rap都有反對聲音，MC Jin話：「去到依家開始用普通話rap，外界都有唔同聲音，有啲人會話『你收皮啦！』」

身為公眾人物除了要心臟夠強大，更重要的是「知道自己做緊乜」，MC Jin由第一日踏足Hip Hop界就明白這個道理。MC Jin在美國發跡，亞洲人rap英文都引起過不同迴響，對於「俾人叫收皮」這件事，MC Jin今天回望，坦然地說：「我初初開始用英文rap嗰陣，『收皮』呢樣嘢，我14歲已經接觸過啦，所以依家三十幾歲先接觸唔會係啲咩，唔會大反應到『吖！佢叫我收皮呀！』」

能夠坦然面對批評才能繼續進步，而且MC Jin相信音樂能夠打破語言限制，他表示：「無論我用咩語言rap都好，我追求嘅係點樣會有突破，點樣可以表達到自己。所以你問我依家開騷會唔會有包袱，有冇顧慮需要減少啲英文呢？我又冇。」

MC Jin又幽默地說：「就算Justin Timberlake去香港開騷，佢都唔會擔心『我全部英文歌點算好呢？』當然佢無啦啦唱首《月亮代表我的心》，我都會嘩一聲啦！但係我亦明白，音樂好正就係有呢個力量去跨過語言問題。」

既然MC Jin能欣然面對對過往的批評，那現在因Hip Hop Man而贏盡掌聲，又會否覺得這個稱呼帶來壓力？他表示：「我明呢樣嘢會變咗一個icon，我不知幾開心啦，其實呢個稱呼好有意思，就係代表緊Hip Hop，所以壓力又冇，同埋覺得係一個榮幸而且唔會濫用佢。」他又提到，如果能透過Hip Hop Man令大眾了解到Hip Hop的歷史，更接受Hip Hop文化使已很滿足。

相信大家都知道Hip Hop Man的出現是來自MC Jin囝囝一句窩心的說話，不過原來都同星爺周星馳有關，MC Jin話：「其實我好多靈感都係嚟自星爺，就好似《食神》入面，星爺最尾講咗句『根本就冇食神，或者個個都係食神。只要用心，人人都可以係食神』，呢個亦都係Hip Hop Man嘅精神。」

正如《Hip Hop Man》歌詞所說：「只要你尊重這個文化，我們個個都在同一個家！」

睇完呢兩集，知道MC Jin點樣捱過艱難嘅日子，又睇到佢可以欣然面對「收皮」嘅聲音，其實真係唔容易。不過對於Hip Hop是否商業化，《中國有嘻哈》帶嚟嘅影響，原來MC Jin都有一套見解，大家記得睇埋一下集喇！