五月天《兄弟》MV 玩「不和」套路　各出陰招互相整蠱

來到2018年，台灣天團五月天為樂迷送上頭炮新年禮物，推出新歌《兄弟》的MV，今次MV邀請到綜藝節目一哥吳宗憲作主持及導演，更於昨日跨年演唱會首播，為樂迷帶來驚喜。MV中五月天一展「兄弟本色」，各出「陰招」互相整蠱，不過當然唔會嬲啦，兄弟嚟㗎嘛！

《兄弟》MV以戲中有戲方式拍攝，五月天眾人戴起黑超，一身復古型仔打扮登場，到吳宗憲主持的節目作嘉賓。吳宗憲問：「你們覺得這個世界上，有永遠的兄弟嗎？」五月天異口同聲說：「當然囉！我們就是一輩子的兄弟！」雖然5人搭晒膊頭，但一cut機就另一個樣，各懷鬼胎。阿信偷走冠佑藏在大鼓裏的私己錢，石頭拍低阿信為女fans簽名的照片send去報館，等等出盡手段。

MV拍攝手法咁有趣，淨係睇畫面都覺得過癮！(MV截圖)

雖然五月天去到盡玩殘兄弟，不過都「前事不計」於一個富麗堂皇的歌廳演出，卻竟然因為冠佑鼓棍甩手打中怪獸，搞到各人大打出手。當然啦，上一段都講過這個MV是「戲中有戲」，吳宗憲一嗌「CUT」，五人又和好如初。最後一句讀白：「我們走過五光十色的20年，我們依然是當初的兄弟！」大家明晒啦！