楊千嬅紅館頭場已經唱到唔捨得 提起囝囝立刻眼濕濕
《楊千嬅三二一GO!演唱會2017》昨日完成第一場演出。演唱會脈絡清晰，每個部份也有驚喜部分，好聽之餘更加好睇。有電台作主題的部分，也有以電影作主題的部分。唱完《電光幻影》後，銀幕播出《春嬌救志明》吉祥物「趷趷剛」的片段，千嬅以Wonder Woman的身份再現台上，這部分Cyber味濃，不單止千嬅換上一副「戰鬥Look」，連舞蹈員也穿得像超人中的達達星人般。這部分主要選唱了跟女性剛強一面有關的歌曲，包括《Wonder Woman》、《新世紀福音戰士》、《烈女》。唱到《烈女》尾聲，台上突然爆出火花及巨響，嚇呆台下觀眾，襯大家仍未回過神來。一輪安靜後，曲風一轉，已由快歌變成慢歌，《洋蔥》、《火鳥》、《我的生存之道》，首首也有回憶。
唱完一輪歌，千嬅又再度與樂迷傾計，帶點余春嬌的感性，又不失大笑姑婆的本色:「跨年騷係我其中一個夢想，因為呢段時間對我嚟講好特別，可以比大家回顧一下自己過去一年做咗啲咩，喺新一年可以對人更好，對自己亦做得更加更加好。雖然今晚係第一晚演出，不過未完我已經唔捨得。」正當台下樂迷大叫:「千嬅唔好喊!」她又突然大笑姑婆上身:「無啦啦做咩喊啫，你又唔係上嚟打我一巴。其實大家係咪鐘意同我傾計多啲，咁大家唔洗買飛入嚟啦，上Facebook搵我咪得。乜我變咗諧星咩?不過我又真係做喜劇出身嘅!咁我而家再拍嘅話，應該拍咩好?《我的生存之道》呀?由細細開始拍返到我大個呀?咁就變恐怖片啦喎!」令台下哄堂大笑。
又一首經典作品，楊千嬅唱出《飛女正傳》後，緊接唱出《親》。千嬅表示:「《親》呢首歌應該係第一次公開唱。呢首歌其實係林夕寫比我同我囝囝，不過佢應該唔明佢媽咪做緊咩嘅，所以我希望將來佢會明白。而呢首歌同時其實都係寫比我自己嘅爸爸媽媽聽…」講到這裡，忍了一晚的淚水，終於從千嬅眼眶中湧現，一時間有點不知所措的她，唯有打圓場：「人大咗面對嘅問題更嚴肅所以我哋應該要珍惜自己嘅家庭，好好孝順自己嘅父母，養育自己嘅下一代，呢個係我哋每個人生存嘅其中一個任務。」時值十點半，千嬅已經話要唱最後一首歌《我係我》，不過老老實實，睇慣演唱會嘅人都知，紅館騷又點會咁早完場，喺觀眾叫足5分鐘Encore之後，楊千嬅正式進入Encore環節。
感謝演唱會團隊時，楊千嬅特意感謝排舞師Sunny Wong。你無聽錯，真係Sunny Wong，你可能會懷疑，之前千嬅演唱會唔係搵咗High King排舞㗎咩?的確，早前經過一輪「零經驗吸低薪舞蹈員」事件後，原來演唱會已經將舞蹈團隊換成Sunny Wong的舞蹈員。千嬅表示:「多謝Sunny Wong咁有義氣去幫我，亦教識我喺適當時候要有決斷力。」事件總算告一段落。
如果一直有留意佢演唱會嘅歌單，你大概會發現到佢之前唱出唔少Side Track作品，反而好多首經典主打仍未出場。所以Encore環節中，千嬅一口氣送上《煉金術》、《閃靈》、《野孩子》、《假如讓我說下去》等，更即興唱出原本不屬於歌單中的《少女的祈禱》，最後以新歌《一二三 三二一》作結，完滿整晚的演唱會。