周慧敏自爆曾患焦慮症 下年個唱可能係告別作？
「玉女掌門人」周慧敏出道30周年，早前宣布將於2018年1月舉行紅館個唱，結果反應大熱，更特意加開一場。雖然不愁門票銷情，不過Vivian近日仍然密密做宣傳接受訪問，希望能與樂迷多溝通。近日接受雷霆881節目《一圈圈》訪問，重提當年事業如日方中時突然引退的往事。
1997年，周慧敏在日本推出了第二張個人日語Single《逢いにゆきたいの》及完成大西洋城的演唱會後，便正式宣布淡出娛樂圈，並與男友倪震移居加拿大。Vivian在節目中，除了憶述當年媽媽反對加入樂壇外，更表示原來早在自己27、28歲時已想過要停低：「當時個人好迷失，十年嘅娛樂圈生涯，每日都好似機器咁唔停。有好多想法同自身需求已經同啱啱入行嗰時嘅小妹妹心態唔同，所以我覺得自己要停低放一個長假，不過冇諗過呢個長假會係咁多年。」
原來Vivian立下決心要引退，源自身體「亮起紅燈」，她憶述：「有一次我拍緊戲，突然覺得隻眼有啲唔舒服，所以我就想同團隊請一個鐘頭假，過海睇眼科。當年都未有保姆車，我自己截的士過海，仲要塞車。嗰一刻我就發現自己唔妥，好焦慮咁喺車上喊，個司機見到都好驚問我有冇事，我同佢講塞車令我好焦慮。經過呢件事，我就覺得要正視呢個問題。」雖然Vivian當年不愁衣食，但她表示：「當時我係搵到錢，但我冇時間去洗，我都感受唔到自己嘅歌手夢想實現咗。所以我覺得要狠啲停低，轉埋電話號碼比自己休息。因為我個人好心軟，我驚自己接到啲工作邀請會唔好意思推。」
不過當Vivian真正停低後，她卻發現不如自己所想：「我發覺原來我好多嘢都唔識，我淨係知點樣做好歌手同演員嘅角色。去到其他事情上，我好似返到去一個小朋友嘅階段咁，連照顧自己都唔知做唔做到。於是我去咗外國生活，由照顧自己開始重新學起。」
對於即將舉行的演唱會，Vivian亦將其視為「最後一次」：「難得自己仲有喺台上做咁Heavy表演嘅魄力，我就覺得今次呢個演唱會一定要做，因為真係做一次少一次，所以我而家已經將呢啲咁Heavy嘅表演，每次都當係最後一次咁做。」