【獨自音樂】說好的支持原來得個講字 小肥：要畀錢就另一回事
不經不覺《獨自音樂》來到第五個星期，今集找來一把熟悉的聲音。他就是來自的歌手小肥（徐智勇）。小肥於2007年在香港出道，他當年在香港推出首張大碟《The First Album of Siufay》後，憑著歌曲《寵物》及《時光機》一鳴驚人。歌曲至今仍是在K房熱唱的作品。在今集的《獨自音樂》中，小肥會為大家現場演繹今年推出的其中兩首新歌《差一點》及《冒雨》。
攝影：江智騫
相信大家對歌手小肥的名字從不陌生，他出道至今曾唱出多首K歌。不經不覺小肥已在香港出道十年了，雖然差不多每一年都有新歌推出，但樂迷印象最深始終都是出道代表作《寵物》：「坦白講《寵物》呢首歌的確令我滑啞。大大話話唱咗千次萬次，不論我《寵物》唱過幾多次，總之開頭聽到《寵物》嘅intro我係悶嘅，但入到歌嘅時候，我依然會投入。每次唱嘅時候見到現場氣氛好好自然就會無咗嗰種滑啞嘅感覺。我會諗，就算啲人唔識我小肥，但起碼認識我兩首歌《寵物》及《時光機》，作為一個歌手如果有兩首歌被人認同已經算好有歌運。」小肥說。
談到十年來聽過最難聽的說話，小肥表示：「其實我由澳門嚟香港做歌手之前有個組合叫C-PLUS。當時我哋好珍惜每一個出騷的機會，只要有機會，我哋可以唔計較收入，因為我哋enjoy個舞台。但係有一次我哋C-PLUS唱完一個騷，有一位女士就塞咗封利是俾我咃。跟住我又聽到，嗰一位女士嘅朋友問佢封咗幾多錢利是，而嗰位女士就話廿蚊囉。佢朋友就話廿蚊咁多！我當時心諗其實嗰封利是我哋可以唔要。呢件事都幾委屈。點解無啦啦要畀人眨值呢。」
小肥曾經得到不少支持的聲音，不過支持與現實卻不成正比：「有好多人曾讚我話我唱得幾好叫我繼續努力加油。但實際嘅支持真係好少。坦白講我好怕喺香港開演唱會。因為上一次港澳同步開演唱會，澳門反應ok，香港就未如理想。我聽過一啲意見就係話，如果小肥搞演唱會緊係好啦，如果有免費飛的話我都好樂意去睇。不過要比錢買就另一回事。大家好似一邊認同我嘅實力叫我加油，但係實際上我喺大家心目中又無嗰價值。」
要數小肥上一張專輯，已經是2014年的事。當時他還在太陽娛樂文化旗下歌手，直到完約後在中間這段真空期，小肥主力處理澳門演藝人協會的工作，在音樂上出產不多，原來當時他已開始為今年的Project開始工作：「其實今次呢個Project嘅發起人係Paco（黃柏高），當年係佢提議我搵Rubberband嘅阿偉做監製。」
小肥由初出道開始已經與Paco合作，無論Paco轉會到其他唱片公司工作，他也會簽小肥成為旗下歌手。不過這個合作關係直到太陽娛樂文化完約後並沒有延續下去：「我同Paco當然係朋友啦，不過有時啲嘢唔係佢控制範圍之內。舊公司（太陽娛樂）始終集中喺電影方面，相對投放喺音樂上嘅資源都會減少。所以Paco喺無辦法之下放我走，我依家喺自己兄弟公司棋人娛樂製作有限公司（澳門）發展自己鍾意嘅音樂。」
入行第十個年頭的小肥，如果你有留意他的派台作品，你會發現他今年所推出的歌曲曲風為大家帶來不少新鮮感：「我以前簽大公司（金牌娛樂、金牌大風、太陽娛樂文化）嘅時候算係一個容易妥協嘅人。好似我第一張大碟《The First Album of Siufay》就係一張我完完全全聽話嘅成品。不過之後我就除咗妥協之餘都會嘗試加入自己意見。到依家與康家俊監製合作，喺音樂上令我變得更大膽。」
的確今年的小肥一反傳統，由今年三月開始連續10個月，每個月推出一首新歌派台，而且他打算把這10首歌變成大碟。這個做法絕對有別於以往一張專輯只力谷兩至三首主打歌：「我相信喺香港樂壇無一個音樂團隊會咁冒險，就算有人做過，都未必會一張碟10首歌，10首都派台。因為呢個做法係挑戰各大音樂流行榜嘅制度。」
小肥續說：「今次呢個《睡前服》project有幾個概念係入面，包括坦白、感恩。坦白係指我以前嘅歌其實好多都唔坦白，好多我都未經歷過。我以前好多歌都講愛情觀，失戀。其實我邊有咁多呢啲經歷。我未試過分手分好似我啲歌入面講到咁慘。簡單啲講我小肥喺愛情上唔係一隻兵。但我又成日要唱一啲做兵嘅歌。不過我對我過去唱過嘅兵歌係有感恩嘅心，因為無呢啲兵歌邊有人會識小肥呢。而今年我所做嘅每一首歌都係表達緊我所講嘅嘢。每次首歌填詞之前，６號@Rubberband仲有Tim Lui都會同我傾得好仔細。大家如果有留意我今年嘅歌，你會發現全部都係大家熟悉嘅人。例如：有Rubberband嘅阿偉幫我做唱片監製、方皓玟、Ellen（盧凱彤@17）、側田、Rubberband６號仲有李拾壹等等。其實除咗呢班人幫我寫歌合唱外，仲有好多第一次，所以今次係真係好新鮮。」