【獨自音樂】除面罩後無人理 龍小菌：其實我唔係好介意！
《獨自音樂》今集找來的歌手龍小菌擔任嘉賓。龍小菌於2012年出道，她曾唱過不少二次創作歌曲。初出道時龍小菌為了不想影響其教師的工作，所以她以「幪面歌手」身份視人。她希望觀眾不要以貌取人並用心去感受其音樂。正因她當時如此神秘，所以當時龍小菌也引來不少人的關注。今集《獨自音樂》她會唱出《繼續追》及《路過蜻蜓》並由結他手阿花@帶菌者伴奏。取景在尖沙咀，因為尖沙咀街頭曾經也是她唱歌的舞台。「其實我以前有一段時間每個星期五及星期六，都會喺旺區行人專用區幪面busking。不過有時都會因為土地問題而過嚟尖沙咀近碼頭呢一邊。所以尖沙咀對我嚟講係一個有意義嘅地方。」龍小菌說。
攝影：謝浩然
龍小菌初初以「幪面歌手」身份唱歌，這造型概念原來是源自於音樂盒：「當初我『幪面』嘅時候我係未有經理人，當時嘅我只係一個教師。我純粹想放我唱嘅歌上網畀人聽而我又唔想出樣，唔想影響我當時嘅工作。後來我想喺街到唱歌，因為見到好多人都busking自己羊群心態所以好想試試，於是我同我朋友阿Dean（現時為經理人：邵子風）講，可唔可以幫我做一個人造音樂盒俾我唱歌，我講緊嘅人造音樂盒係一個黑色嘅箱，而出面有個喇叭嗰種。後來因為考慮到重量運輸等問題所以打消呢個念頭變成一個面罩，一套衫。」
除了因為當時的職業令到龍小菌選擇幪臉唱歌外，其實她也曾試過體重超過二百磅，自覺自己又肥又醜，被人評頭品足。這也是她當時選擇成為一位「幪面歌手」的原因之一，不過現在的她似乎想法也改變了：「入行後有好多前輩同我講做得artist緊係瘦啲上鏡啲，我當然係認同啦。但係近年我見開始唔同，我見到一啲好有個性，或者身型上唔一定係瘦嘅artist都有好多工作機會，所以我覺得其實一切都係機遇。我覺得而家做artist唔一定要改變自己身型，樣貌，隻眼變大啲。有時就算你天仙咁靚都未必有job。」
曾經有網民質疑幪面歌手只是一個成為歌手的宣傳套路，對此小菌表示：「有好多人會覺得我幪面係一個宣傳策略，又有人會認為一切帶面罩除面罩都係為搵錢，但我絕對唔認同，其實幪面只係一個需要。我其實做呢行無乜搵過錢，要搵錢方法有好多，你想搵錢唔做呢一行啦。」
小菌曾因帶面罩唱歌而得到不少人關注，不過當她揭開面罩後關注度相對減少：「我認同我揭開面罩後係少咗人關注，其實我唔係好介意。當時我喺工作上轉緊型。由唱二次創作轉為唱原創作品。我明白到唱二次創唱嘅時候真係比較多人會聽，因為呢啲歌曲本身大家已經聽過，然後我再加啲搞笑嘅詞諷刺時弊，多人聽係正常。但後來我開始做自己嘅創作，開始無咁多人聽。我明白到做原創歌曲係比二次創作辛苦，但正因為難我更加要去挑戰。」
「我諗有好多人會疑惑究竟龍小菌靠乜嘢維生，點解佢死極都死唔去嘅呢？其實我閒時有創作一啲廣告歌，亦有幫幼稚園寫一啲音樂教材。我一共要寫八十首歌，咁而家依經寫完一半。其實我龍小菌食嘢唔多但人就生得好大隻。其實我想講如果每個人只要學識知足，其實要生活唔難。」龍小菌說。
龍小菌由2012年入行成為歌手至今5年的時間，曾推出兩張專輯，要數對上一張專輯已是3年前的事，在這段時間龍小菌除了有拍攝電視台打拳真人騷節目外，她完成了碩士學位課程：「喺屋企人眼中有高嘅學歷係一種榮譽。坦白講我媽咪係唔識字，佢都近依一兩年先有小學畢業程度。對佢嚟講佢嘅夢想可能就係有大學畢業嘅程度。當我諗起佢由一個完全唔識字嘅人佢都會好鼓起勇氣去讀書，所以讀書呢樣我讀到幾多，我點都會讀落去。」
龍小菌續說：「呢幾年我除咗讀書，仲有走去做拳手，參加ViuTV節目《G-1格鬥會》。本身我覺得呢個節目已經好有挑戰性，加上我仲可以為呢個節目唱主題曲《硬仗》，所以都係開心嘅事。《硬仗》係由我隊Band『帶菌者』一齊創作，所以呢首歌亦係『帶菌者』比較多人認識嘅作品。其實呢個時代做歌手好難，就算我而家擺我啲歌上電視台播，都未必有人睇電視，所以做音樂真係唔容易。廣東歌喺每個時代都會有經典，我好希望我可以有自己嘅經典。」
龍小菌唱出由她樂隊「帶菌者」創作的作品《繼續追》（點撃以下影片收看）