【一圈圈】陳柏宇登上事業巔峰期　寧做二線歌手：我唔想上一線呀

陳柏宇(Jason)，近年來一直被人冠稱為「隱世歌手」，當然因為他扣人心弦的歌聲，加上低調的性格，又或者是頒獎禮從來未有得到認同的肯定，所以大家都開始為他抱不平。上年年尾，Jason終於迎來自己在頒獎禮上的高峰，叱咤樂壇男歌手銀獎、新城勁爆男歌手銀獎、十大中文金曲獎、勁歌金曲獎等等的獎項都為他的粉絲帶來歡愉。今年又正式第一次在紅館開兩場演唱會，人氣可謂正值出道至今的巔峰時期。

正當大家以為他大器晚成，可以開始正式登上一線，千禧年後上得一線除了張敬軒，Jason可能就是第二個了。不過Jason並沒有此想法，根據今日電台節目《一圈圈》的訪問，原來他完全不想做一線歌手。以下為節錄：

主持人梁泰來表示曾經於2013年看過一個關於Jason的訪問，當時Jason表示自己是三線歌手，原來他已經忘記當時自己說過這些說話，他表示：「係咩？我唔記得咗喇，我諗而家二線喇，我唔想上一線呀。我好想永遠都做住二線嘅原因，甚至三線，係因為我自己本身鍾意做配角，喺台上面有壓力咁唱歌，我係咪好享受呢？唔係嘅，但如果我同另一個歌手喺台上面唱歌，無論個歌手紅過我定唔紅過我都好喇，其實我個壓力突然之間就會減少，因為我知道個焦點分散咗，唔係得我一個人撐住。如果我想上一線，我咪要承擔一線嘅心態囉，但係我唔想，我覺得做一線嘅歌手，有一樣嘢我係唔想嘅，就係無咗自由。身邊嘅人都會話你聽，你而家呢個位置有啲嘢你係唔做得，有啲嘢你係唔講得，有啲嘢要俾下面嘅人做。我係唔相信呢一套嘅，我自己做到嘅嘢我咪做囉……上咗一個位之後，係有好多人幫你做其他嘢，自己剩係顧住一個形象就ok喇，但就真係無咗個自由，人哋又唔俾你踢拖落街，朝頭早起身落茶餐廳又唔可以未梳頭，著住件T或著短褲，有時我真係就咁落去架嘛，我鍾意呢種感覺，我鍾意呢種無拘無束。」

其實以他的唱功，粉絲程度，歌曲傳唱，樂壇資歷，都足夠他登上一線歌手這個地步。不過依他所說，上了一線歌手，的確有很多事情會身不由己，可能出歌量會增多，品牌宣傳又會多，雖然錢方面都會相對地增加，不過損失的可能就是自己私人時間。尤其是他剛結婚不久，前排新聞都傳他想努力做人，相信寧願會把更多的時間留給老婆。