【獨自音樂】Freeze組合出道行性感 石詠莉：出街被人指住鬧
「01音樂」全新節目《獨自音樂》，來到第二集。今集嘉賓可以以「重生歌手」來形容。她就是歌手Sukie S石詠莉。她剛出道雖然即獲公司力捧，但她曾因性感路線及被指整容等等的各種事情，被人看低一線，認為她除了賣弄性感，沒有真材實料。石詠莉在2007年以女子組合Freeze身分出道，Freeze出道時走性感火辣路線，而且更被外界形容為「整容三嬌」。組合解散後到兩年前，她以藝名Sukie S重新出發，在網上得到好評。她的HI-FI唱片也成了銷量保證，先後榮獲 IFPI十大銷量廣東唱片2015，IFPI十大銷量本地歌手2015 兩大奬項。到今年她在IFPI香港唱片銷量大獎頒獎禮2016再接再勵，成為十大銷量本地歌手之一。專輯《Sukie S Welcome 2 My Destination》也成為十大銷量廣東唱片。
攝影：謝浩然
髮型：Casei @Beijing Hair Culture（CWB）
化妝：Kayte Fung
今集的《獨自音樂》在西貢拍攝，全因西貢就是Sukie長大的地方：「對我嚟講，西貢係一個好有回憶嘅地方，我細細個就喺呢到長大。爸爸係做養魚批發。細個嘅時候家境並唔富裕，無玩具玩。我嘅娛樂只係假日同爸爸去魚場玩。記得有一次，爸爸已經將魚池啲魚送走之後，由於個魚池無魚，所以我以發泡膠箱作為船，喺四方形嘅魚池入面扮出海。有時爸爸喺西貢海鮮街送貨，佢又會拎一隻綁住海草嘅蟹仔送俾我做寵物。雖然屋企唔係富有，但呢啲小玩意已經令我好開心嘅童年回憶，更何況呢種經歷唔係個個人都會有。」
相信每個人的生活上總會有寂寞之時，這位「重生歌手」歌手石詠莉也不例外：「我啱啱入行做組合（Freeze）嘅時候其實都幾寂寞，因為真係無咩人明白我。做嘅嘢都唔係我入行嘅初衷，其實我做人好簡單，就係鍾意唱歌。只有有機會分享我嘅音樂我就會去嘗試。有好多朋友會問我，Sukie你初時走去做Freeze會唔會同你想行嘅音樂路唔同，反而仲兜遠咗？但我會諗其實如果當時無咁行過，就無依家嘅Sukie。呢一段成長經歷對於我嚟講係一個好重要嘅歷練。」
石詠莉坦言：「做Freeze嘅時候我的確係受過好多人嘅白眼。我記得當時出街去見朋友都有遇過路人指著我嚟鬧。佢地會話我整容，話我只係識性感，全部都係一啲難聽嘅說話，依家嘅我係唔會嬲，因為我已經唔同咗，我希望大家可以透過我近年做嘅音樂再重新認識Sukie。當時我係覺得好辛苦，不過我會諗只要為咗夢想呢一切都唔緊要。」
《不願一個人》主唱：Sukie S／ 結他伴奏：葉肇中（音樂監製）
談到入行初時的辛酸，Sukie表示她也曾經有一段靠麵包渡日的日子：「我記得當初入行嘅時候我曾有段時間一日只可以有5蚊用嚟吃飯。所以我就喺屋企附近嘅一間麵包店，買一條好大嘅麥包畀自己充饑。如事者我嗰一個月都係食麥包。點解？因為我都需要照顧自己屋企人，而且當時嘅我收入唔多。」
2007年入行的石詠莉，不經不覺都入行第十個年頭，雖然如此，但正式有人聽她唱歌才是早年的事。單飛後的她，雖然在音樂路上重新出發，但一切也得來不易：「幾年前我同Patick（男友鄧健泓）好想出一張HIFI大碟，當時做咗一首歌，我好想借呢首歌sell畀唱片公司去投資我出唱片，但最後都係失敗。當時聽到好多唱片公司高層嘅冷言冷語，『幫呢個女仔出碟會影響公司形象』、『吓！佢呀？佢做極都做唔起，唔好哂力氣啦！』雖然呢啲說話聽完係好傷心，但同時都係呢幾番話成為我進步嘅動力。所以我要多謝佢哋嘅冷言冷語。」
在石詠莉的眼中，只要有人真心聆聽她的音樂，她已經心滿意足，她希望得到的只是「歌手」這個稱號：「我好記得當時我用『Sukie S』呢個名張我第一首重新改編嘅歌曲《結他低泣時》放上網。呢個喺一個見唔到我個樣嘅MV，因為我好怕人哋見到石詠莉呢三個字之後會先入為主。點知網民嘅留言好正面，又會問呢位女歌手係邊個，會唔會係楊千嬅、陳慧琳或吳雨霏。我當時覺得原來用聲音為先，係啱嘅決定，單靠聲音真係會有人去欣賞。」