【專訪】C AllStar未開騷先嘗單飛苦頭 成員自嘲唔識唱歌
成軍8年，C AllStar 4位成員由廿歲出頭的後生仔，瞬間變了一代年輕人的偶像。時日如飛，曾為80後唱出時代曲4人，將舉行他們的最後一個演唱會。10月於紅館舉行的兩場《生於C AllStar演唱會》，謝幕時亦將為C AllStar 4子的Last Day劃上完美句號。但比起不捨，四人似乎更期待獨立發展後的各人能在不同舞台上更發光發亮。他們的惺惺相惜，正好造就出最適時的告別。
攝影：楊晴
髮型：Zanki@iHair
服裝：Harvey Nichols
化妝：Nana Wong
Styling：Will Yu
場地提供：J plus hotel by yoo
由出道至現時，C AllStar亦是不停試新嘢，明明現在他們出歌已可說是穩陣有收聽率，但他們仍是決定單飛，到底是否寧願冒一下險，也不願固步自封行穩陣路線？思量一會，Jase表示：「其實又冇得咁分嘅，唔可以話自己係非主流所以我就唔做主流嘅嘢，又或者我自認主流，就放棄做非主流嘅嘢。音樂本身就好應該百花齊放，但係啲人而家好鍾意音樂上嘅分化，即係我撐非主流，我就唔聽主流。但喺音樂嘅世界上，呢個係好錯嘅概念。主流有分好嘅K歌、唔好嘅K歌，就算indie（地下樂手）都一樣可以有廢嘅indie。」對於香港嘅音樂文化，Jase再補充：「而家已經唔係80年代Cantopop嘅年代，淨係做日本翻唱情歌就搞得掂，大家睇吓成個世界嘅音樂已經唔係咁樣運行，例如EDM（電音） ，可能喺香港唔係好流行，不過係全世界已經取代咗Hip Hop同R&B成為最大嘅音樂市場，係音樂界嘅新寵。不過Hip Hop同R&B喺全世界都被取締緊嘅時候，香港有冇人做呢兩樣嘢呢？一樣係無嘅，所以我覺得香港嘅音樂市場係應該有更加多嘅音樂類型，廣東話亦值得有更多嘅音樂可以放落去。當然K歌亦唔代表乾塘，始終我哋香港人就係聽住呢啲音樂大，我哋呢啲流行歌手，更加要將呢種文化做得更好。所以你問我哋係咪唔行穩陣路線，我哋唔係唔行，而係做就要做好嘅K歌。」
早前推出大碟《LoveaHolic》Vol.1及Vol.2，4子提早嘗試單飛做歌滋味，他們也表示真的要習慣沒有其他兄弟依賴的日子。On仔更大爆：「今次自己做歌，我搵咗Adrian Chan嚟幫手編曲同監製，其實由《天梯》開始已經識佢，亦一直好想搵佢合作。佢做錄音嘅方式同其他人好唔同，有一次佢同我講『On仔，我好怕你去洗手間，因為你個集中力好快會甩呀，你去完洗手間嗰兩take通常都唔得。』我聽完佢咁講就小小都唔敢放鬆，佢係一個好了解我身體狀況嘅人，連尿頻情況係點都知呀。所以嗰次錄音係比平時快嘅，大概三個鐘就錄起大部分，嗰下會覺得，原來自己都識唱歌喎。」
而釗峰初嘗單飛滋味，似乎也有所領悟：「當我知道要自己做一首歌，一收到份詞嗰下，我腦海入面就彈咗3個監製嘅名出嚟，咁我同其他兄弟一樣都係抱住向外闖一闖嘅心態，於是我將呢3個名交咗俾我哋嘅監製阿簡。佢同我講：『好…不過由於有啲現實嘅情況呢，你有兩位兄弟已經闖一闖啦，budget上未係好做到你嘅要求住。』我當下就覺得，音樂都真係一樣講求現實嘅事情，無乜所謂啦，其實又好似返到去最初做歌手嘅心態，又可以同阿簡、賴映彤呢兩位一直扶持我哋成長嘅人合作，我覺得佢地真係我生命中嘅靈魂伴侶。同埋今次冇咗3位兄弟去傍住，其實我真係開始摸索返，到底自己係咪識唱歌呢？」
除了演唱會主題曲《此刻無價》，C AllStar在演唱會前準備了不少新歌，包括《靈魂進化》。提起此曲，特別在歌曲班底比起以往賴映彤包辦作曲編曲，今次On仔及阿King也發揮自己所長，由On仔親自作曲、阿King與賴映彤共同編曲。在之前作曲中，不少樂迷也應該知道On仔作曲有一手，不過今次最大的驚喜在於阿King的電音編曲，他們表示：「阿King好鍾意電音，佢差唔多浸淫咗喺呢個世界年幾兩年，成日都唔瞓覺埋頭苦幹。今次就好好機會啦，演唱會前要出新歌，佢又更加有藉口唔瞓覺啦，俾佢愉快失眠。」On仔表示：「電音可能我地聽得比較多英文、韓文、日文，我地一直都諗緊點樣擺落廣東話度，而係唔MK嘅。因為廣東話好多發音比較倔，所以錄音嘅時候，我地嘅唱法都要就一就。」而熱愛電音的阿King亦少有主動發言：「傳統廣東歌要將人聲推到好前，樂器就會喺後面。不過EDM就唔得，通常個比例都係五五比，喺電音嘅概念入面，人聲都係樂器嘅一部分。」
C AllStar在2013年曾推出一隻大碟《Cantopopsibility》，內容是主打廣東話歌的「實驗」，把不同曲風和元素放進廣東話，看看可能性有多大。事隔4年，C AllStar認為自己做音樂的初衷仍未改變：「好似頭先講開電音咁，都識講英文唱可能會舒服啲，咁點解我哋仲要用廣東話呢？其實又唔係因為咩捍衛廣東話咁偉大嘅，不過都係想嘗試吓囉，因為廣東歌嘅電音市場唔係大，做嘅人唔多，咁阿King就好想實驗吓個效果出嚟會係點。可能用英文國語會容易啲做嘅，不過點都唔係我哋母語嘛。」